બબાલ / પતંગના પેચ લડાવવા બાબતે મહેસાણામાં માથાકૂટ: 5 શખ્સોનો પરિવાર પર ઘાતક હુમલો, વૃદ્ધનું મોત, 3 ઈજાગ્રસ્ત

 

• મહેસાણામાં વાસી ઉત્તરાયણ બની જીવલેણ
• પતંગનો પેચ લડાવવા મુદ્દે પરિવાર પર હુમલો
• એક વૃદ્ધનું મૃત્યુ અને 3 લોકો ઈજાગ્રસ્ત ઈજાગ્રસ્ત

મહેસાણામાં વાસી ઉત્તરાયણ જીવલેણ બની છે. શહેરમાં પંતગનો પંચ લડાવવા મુદ્દે પાંચ શખ્સોએ પરિવાર પર હુમલો કરતા વૃદ્ધનું મોત નીપજ્યું છે. જ્યારે ત્રણ લોકો ઈજાગ્રસ્ત થયા છે. હાલ પોલીસે પાંચેય શખ્સોને ઝડપી પાડવા માટે ચક્રો ગતિમાન કર્યા છે. 

પતંગના પેચ લડાવવા મુદ્દે થયો હતો હુમલો
મળતી માહિતી અનુસાર, મહેસાણા શહેરની ઉમાનગર સોસાયટીમાં રહેતા નાગજીભાઈ વણજારા પોતાના પરિવાર સાથે પતંગ ઉડાડી રહ્યા હતા. આ દરમિયાન આ જ સોસાયટીમાં રહેતા વનરાવન બાબુજી ઠાકોર સાથે પતંગના પેચ લગાવા મામલે બોલાચાલી થઈ હતી. 

નાગજીભાઈ વણઝારા નામના વૃદ્ધની હત્યા
આ દરમિયાન 5 જેટલા શખ્સો લોખંડના પાઈપો, લાકડીઓ લઈને નાગજીભાઈ વણજારાના ઘરે દોડી આવ્યા હતા. આ શખ્સોએ નાગજીભાઈ અને તેમના પરિવાર પર હુમલો કર્યો હતો.  પાંચ શખ્સે ઘેરીને નાગજીભાઈ વણજારાને ધોકા-લાકડીઓ અને લોખંડની પાઇપો માથાના મારતાં તેમને લોહીલુહાણ હાલતમાં સારવાર માટે સિવિલ હોસ્પિટલ લઇ જવાયા હતા. જ્યાં સારવાર દરમિયાન તેમનું મૃત્યુ નીપજ્યું હતું. 

5 આરોપીઓ વિરુદ્ધ ફરિયાદ
તો આ અંગેની જાણ થતાં જ એ ડિવિઝન પોલીસની ટીમ પણ હોસ્પિટલ ખાતે દોડી આવી હતી. મૃતકના દીકરા માગીલાલ નાગજીભાઈ વણજારાએ  મહેસાણા એ ડિવિઝનમાં પાંચ શખ્સો વનરાવન બાબુજી ઠાકોર, હરેશ કેશવ લાલ રાવળ, ચિરાગ હરેશભાઇ રાવળ, બોબી હરેશભાઇ રાવળ અને સુનીલ રમેશચંદ્ર વ્યાસ વિરુદ્ધ ફરિયાદ નોંધાવી હતી. હાલ પોલીસે મૃતકના દીકરાની ફરિયાદના આધારે આરોપીઓને ઝડપી પાડવા ચક્રો ગતિમાન કર્યા છે.