- સાચવવાવાળો બેઠો છે દ્વારિકાનો નાથઃ લોકોએ રીલ્સ વાઇરલ કરી
- રીલ્સ પાછળનું સૌથી મોટું કારણ બિપરજોય વાવાઝોડું છે
- વાવાઝોડાના પગલે તંત્ર ગંભીર ત્યારે યુવાઓ રિલ્સ બનાવવામાં મસ્ત
સાચવવાવાળો બેઠો છે દ્વારિકાનો નાથ જો, અરે રણછોડરાયની આગળ કોઇનું નહીં ચાલે.....આ રીલ્સ અત્યારે સોશિયલ મીડિયામાં સૌથી વધુ જોવા મળી રહી છે. આ રીલ્સ પાછળનું સૌથી મોટું કારણ બિપરજોય વાવાઝોડું છે. જે હાલ ગુજરાતમાં આવ્યું છે. દ્વારકા, પોરબંદર, જામનગર, કચ્છ સહિત ગુજરાતનાં વિવિધ શહેર તેમજ જિલ્લામાં બિપરજોય તબાહી મચાવી રહ્યું છે ત્યારે લોકો સોશિયલ મીડિયામાં રિલ્સ બનાવવામાં મસ્ત છે.
છેલ્લા બે દિવસથી ગુજરાતના માથે બિપરજોય વાવાઝોડાનું સંકટ મંડરાઇ રહ્યું છે. જેને લઇને તંત્ર એલર્ટ મોડ પર આવી ગયું છે અને સેનાની ત્રણેય પાંખ, એનડીઆરએફ સહિત પોલીસના જવાનો સ્ટેન્ડ બાય કરી દીધા છે. બિપરજોય વાવાઝોડાનાં રિલ્સ બનાવવાનું યુવાઓને ઘેલું લાગ્યું છે. ભક્તિ, આસ્થા અને મસ્તી સાથે લોકો વિવિધ પ્રકારનાં રીલ્સ બનાવી રહ્યા છે.
વાવાઝોડાના પગલે તંત્ર ગંભીર છે ત્યારે યુવાઓ રિલ્સ બનાવવામાં મસ્ત છે અને અસરગ્રસ્તો દુઆમાં વ્યસ્ત છે. ફેસબુક, વોટ્સએપ સ્ટેટસ, ઇન્સ્ટાગ્રામ સહિતની સોશિયલ મીડિયામાં બિપરજોય વાવાઝોડાના સમાચાર, રીલ્સ સહિતની માહિતી જોવા મળી રહી છે. વાવાઝોડાની અસર ઓછી થતાં કેટલાક લોકોએ રાહતનો શ્વાસ લીધો છે અને દ્વારિકાધીશ અને સોમનાથ મહાદેવનો આભાર માન્યો છે.
વાવાઝોડાની ગંભીરતા સમજ્યા વગર કેટલાક લોકોએ સમગ્ર સ્થિતિને મજાક બનાવી દેતાં રીલ્સ મૂકી દીધાં હતાં. જેના કારણે લોકોએ પોતાનો આક્રોશ વ્યક્ત કરીને તેમને ટ્રોલ પણ કર્યા છે. લોકો સોશિયલ મીડિયાનાં માધ્યમથી એક થયા છે અને સેવા કરવા માટે પણ આગળ આવ્યા છે. બિપરજોય વાવાઝોડાના કારણે સોશિયલ મીડિયામાં ભક્તિ, મસ્તી અને ટેન્શનનો સૂર જોવા મળ્યો છે.
