ટેક્નોલોજી / હવે ફ્રીમાં રિચાર્જ થઇ જશે તમારો મોબાઈલ ફોન, નહીં પડે વિજળીની જરૂર!

• ટેરેસ પર અથવા ઘરની બહાર સોલાર ચાર્જર રાખવું પડશે
• થોડા કલાકોમાં તમારો મોબાઈલ ફુલ ચાર્જ થઈ જશે
• આ ચાર્જર વીજળીથી ચાલતા ચાર્જર કરતા ઘણા સસ્તા છે

આજે પણ ભારતમાં ઘણા એવા ગ્રામ્ય વિસ્તારો છે, જ્યાં વીજળીની સમસ્યા ખૂબ જ વધારે છે. આજ કારણે લોકોને પોતાના ફોન ચાર્જ કરવામાં ઘણી મુશ્કેલીનો સામનો કરવો પડે છે. જોકે હવે તમે સોલાર મોબાઈલ ચાર્જરની મદદથી આ સમસ્યાનું સમાધાન કરી શકો છો. ખાસ વાત એ છે કે, આ ચાર્જર વીજળીથી ચાલતા ચાર્જર કરતા ઘણા સસ્તા છે. આ સિવાય આ ચાર્જર એવા લોકો માટે ખૂબ સારા છે જેઓ વારંવાર એક જગ્યાએથી બીજી જગ્યાએ મુસાફરી કરે છે.

ઘણી વખત મુસાફરી કરતી વખતે તમારે એવી જગ્યાએથી પસાર થવું પડે છે જ્યાં વીજળીની સમસ્યા હોય અથવા તમને ચાર્જર માટે સોકેટ મળતું નથી. આ સ્થિતિમાં સોલર ચાર્જર કોઈપણ ઇમરજન્સી કિટનો આવશ્યક ભાગ બની શકે છે. તેને સાથે લઈ જવું ખૂબ જ સરળ છે. તેને ગમે ત્યાં સરળતાથી લઈ જઈ શકાય છે.

સોલર મોબાઈલ ચાર્જરની મદદથી તમે તમારો મોબાઈલ ફ્રીમાં ચાર્જ કરી શકો છો. આ માટે તમારે વીજળીની જરૂર નહીં પડે અને ન તો જનરેટર કે ઇન્વર્ટરની જરૂર પડશે. એવામાં સોલર ચાર્જર તમારા વીજળીના બિલમાં પણ ઘટાડો કરી શકે છે.

શું છે સોલર ચાર્જર ?
સોલાર ચાર્જર સૌર ઉર્જાથી ચાલે છે. જો તમારા ઘરમાં વીજળીની વ્યવસ્થા નથી અથવા વીજળી ઓછી આવે છે તો તમે સોલાર ચાર્જરની મદદથી તમારા મોબાઈલને ફ્રીમાં ચાર્જ કરી શકો છો. 

થોડા કલાકોમાં ફોન ફુલ ચાર્જ થઈ જશે
તમારા મનમાં સવાલ હશે કે સોલાર ચાર્જરથી મોબાઈલ ફોન કેવી રીતે ચાર્જ થતો હશે ? તમને જણાવી દઈએ કે મોબાઈલ ચાર્જ કરવા માટે તમારે ફક્ત તમારા ટેરેસ પર અથવા ઘરની બહાર સોલાર ચાર્જર રાખવું પડશે અને દિવસના સમયમાં જ્યારે સૂર્યપ્રકાશ આવશે તો તે તમારો ફોન ચાર્જ કરવા લાગશે. થોડા કલાકોમાં તમારો મોબાઈલ ફુલ ચાર્જ થઈ જશે.