રાજકોટ આવાસ કૌભાંડ કેસમાં બંને કોર્પોરેટર સામે કાર્યવાહી હાથ ધરવામાં આવી છે. તેમજ આવાસ યોજનાનું લિસ્ટ પણ વેબસાઈટ પરથી હટાવવામાં આવ્યું છે. મનપાનાં આવાસ વિભાગનાં અધિકારીઓ રિપોર્ટ સોંપશે. જો રિપોર્ટમાં કસુરવાર ઠરશે તો આકરી કાર્યવાહી કરવામાં આવશે.
Share
રાજકોટ આવાસ યોજનામાં કૌભાંડને લઈને શહેર ભાજપ દ્વારા કાર્યવાહી કરવામાં આવી છે. વોર્ડ નંબર 6ના કોર્પોરેટર દેવુબેન જાદવનું ચેરમેન પદેથી રાજીનામું લેવાયું છે. દેવુબેન જાદવ કાયદો અને વ્યવસ્થા સમિતીના ચેરમેન હતા. ઉલ્લેખનીય છે કે કોર્પોરેટરના પતિ મનસુખ જાદવના પૈસાની માગણીનો વીડિયો વાયરલ થયો હતો. આવાસ તથા નોકરીમાં ભરતીને લઈને પૈસા માગતો વીડિયો વાયરલ થયા બાદ શહેર ભાજપ દ્વારા કાર્યવાહી કરવામાં આવી છે. દેવુબેન જાદવના પતિ પર આવાસમાં ભ્રષ્ટાચારના આક્ષેપને લઈને ચેરમેન પદેથી રાજીનામું લેવાયું છે. તો સાથે જ તપાસ પૂર્ણ ન થાય ત્યાં સુધી કોર્પોરેટરનો પાલિકામાં પ્રવેશ નિષેધ કરવામાં આવ્યો છે.
કોર્પોરેટર સામે કાર્યવાહી હાથ ધરવામાં આવી
રાજકોટ મહાનગરપાલિકાની હદમાં છેલ્લા બે દિવસથી આવાસ કૌભાંડનો મુદ્દો ગુંજી રહ્યો છે. ત્યારે આવાસ કૌભાંડના આક્ષેપ મામલે મહાનગરપાલિકા દ્વારા તપાસ કમિટીની રચના કરી દેવામાં આવી છે. તો બીજી તરફ શહેર ભાજપ પ્રમુખ દ્વારા કોર્પોરેટર દેવુબેન જાદવ અને તેમના પતિ સામે કડક કાર્યવાહી પણ કરવામાં આવી છે. જેમાં કોર્પોરેટર દેવુબેન જાદવ પાસેથી ચેરમેન પદ ભાજપ દ્વારા લઈ લેવામાં આવ્યું છે. તેમજ જો કોર્પોરેટર પર ભષ્ટ્રાચાર સાબિત થશે તો તેઓની સામે કડક કાર્યવાહી ભાજપ પક્ષ દ્વારા હાથ ધરાશે.
કમિશ્નર દ્વારા તપાસ કમિટીની રચના કરવામાં આવી
રાજકોટ મહાનગરપાલિકા દ્વારા તાજેતરમાં ગોકુલ નગર આવાસ યોજનામાં બાકી રહેલા 193 આવાસનો ડ્રો કરવામાં આવ્યો હતો. ત્યારે રાજકોટ મહાનગરપાલિકાના મહિલા કોર્પોરેટરોના પતિઓ દ્વારા મળતીયાઓના નામે 20 જેટલા આવાસો પચાવી પાડ્યા હોવાના આક્ષેપો કરવામાં આવ્યા હતા. ત્યારે સમગ્ર મામલે રાજકોટ મહાનગરપાલિકા કમિશનર આનંદ પટેલ દ્વારા તપાસ કમિટીની રચના કરવામાં આવી છે. ત્યારે રાજકોટ શહેર ભાજપ દ્વારા પણ મોટી કાર્યવાહી હાથ ધરવામાં આવી હોવાનું સામે આવ્યું છે. રાજકોટ વોર્ડ નંબર છ ના કોર્પોરેટર દેવુંબેન મનસુખભાઈ જાદવ પાસેથી કાયદો અને નિયમન સમિતિના ચેરમેન પદેથી રાજીનામું લઈ લેવામાં આવ્યું છે. જ્યાં સુધી તપાસ પૂર્ણ ન થાય ત્યાં સુધી કોર્પોરેશનમાં તેમજ પાર્ટીના કોઈપણ કાર્યક્રમમાં હાજરી ન આપવા સૂચના પણ આપવામાં આવી છે. તો સાથે જ કોર્પોરેટર દેવુંબેન જાદવના પતિ મનસુખ જાદવના ત્રણ જેટલા વિડિયો પણ વાયરલ થયા છે. જે વાયરલ થયેલા વીડિયોમાં ફિમેલ હેલ્થ વર્કરની નોકરી માટે અઢી લાખ રૂપિયાની માંગણી કરવામાં આવતી હોવાનું પણ સામે આવ્યું છે. ત્યારે સમગ્ર મામલે રાજકોટ શહેર ભાજપ પ્રમુખ મુકેશ દોશીનું કહેવું છે કે બંને કૌભાંડ મુદ્દે તેમના પર કાર્યવાહી કરવામાં આવી છે.
