- નેશનલ હાઇવે પર હિટ એન્ડ રન
- ઘટનાના CCTV આવ્યા સામે
- ટેન્કરે સાયકલ ચાલકને લીધો અડફેટે
- અકસ્માતમાં સાયકલ ચાલકનું મૃત્યુ
વલસાડ નજીક નેશનલ હાઇવે પર હિટ એન્ડ રનની ઘટના સામે આવી છે. વલસાડ ધરમપુર ચોકડીથી ધમડાચી સાઇકલ ઉપર જઇ રહેલા આધેડને રામદેવ ઢાબા સામે સુરત તરફ જતા ટેન્કરના ચાલકે અડફેટે લેતા સાયકલ ચાલકનું મોત નિપજ્યું હતું. તો પકડાઈ જવાની બીકે સુરત તરફ ભાગી રહેલા ટેન્કરના ચાલકે સ્ટેરિંગ ઉપરથી કાબુ ગુમાવતા ટેન્કર પણ પલટી મારી ગયું હતું. જેથી રાહદારીઓએ ટેન્કર ચાલકને ઝડપીને પોલીસના હવાલે કર્યો હતો. આ સમગ્ર ઘટના CCTV કેમેરામાં કેદ થઈ છે.
સાયકલ ચાલકને અડફેટે લેતા મોત
મળતી માહિતી અનુસાર, વલસાડના ધમડાચી ખાતે રહેતા ભરતભાઈ રામજીભાઈ સુરતી (ઉં.વ 52) નોકરીએ છૂટીને સાયકલ પર ઘરે જઈ રહ્યા હતા. આ દરમિયાન વલસાડ-ધરમપુર હાઈવે પર ટેન્કર ચાલકે પોતાનું ટેન્કર પૂરપાટ ઝડપે અને ગફલત ભરી રીતે હંકારીને સાયકલ પર ઘરે જઈ રહીલા ભરતભાઈને એડફેટે લીધા હતા. જેમાં સાયકલ પર સવાર ભરતભાઈનું મૃત્યુ નિપજ્યું હતું.
ભાગી રહેલા ટેન્કર ચાલકે સ્ટેરિંગ ઉપર ગુમાવ્યો કાબુ
આ અકસ્માત સર્જી વાપીથી સુરત તરફ જતા ગેસના ટેન્કરના ચાલકે ઉભા રહેવાને બદલે ત્યાંથી ભાગી જવાનો પ્રયાસ કરતા ટેન્કરને ફૂલ સ્પીડમાં ભગાવી મૂક્યું હતું. જે દરમિયાન ચાલકે સ્ટેરિંગ ઉપરથી કાબુ ગુમાવતા ટેન્કર પલટી મારી ગયું હતું.
હાઇવે પર જામની સર્જાઈ હતી સ્થિતિ
જેથી રાહદારીઓએ ટેન્કર ચાલક ઈબ્રાહીમ અબુહસમ શેખને ઝડપી લીધો હતો અને આ સમગ્ર મામલે પોલીસને જાણ કરી હતી. જેથી પોલીસની ટીમ તાત્કાલિક બનાવ સ્થળે દોડી આવી હતી. ટેન્કર રોડ પર પલટી મારી જતા હાઇવે પર ટ્રાફિક જામની સ્થિતિ સર્જાઈ હતી. જેથી વલસાડ રૂલર પોલીસની ટીમને ભારે જહેમત બાદ બે ક્રેનની મદદથી રસ્તા વચ્ચે પડેલા ગેસ ટેન્કરને હટાવવામાં સફળતા મળી હતી. હાલ પોલીસે મૃતક ભરતભાઈના પરિવારની ફરિયાદ પર ટેન્કર ચાલકને ઝડપી કાયદેસરની કાર્યવાહી હાથ ધરી છે.
