- હાર્ટ એટેકના કિસ્સાઓમાં ચિંતાજનક વધારો
- પ્રખ્યાત બોડી બિલ્ડરનું હાર્ટ એટેકથી મોત નીપજયુ
- પ્રેમરાજ અરોરાનું ન્હાતી વેળાએ મોત
હાલની સ્થિતિએ હાર્ટ એટેકના કિસ્સાઓમાં ચિંતાજનક વધારો જોવા મળી રહ્યો છે. ક્રિકેટ રમતી વખતે તો ક્યારેક ડાન્સ કરતી વખતે અને ક્યારેક ચાલતી વખતે હાર્ટ એટેક આવી રહ્યા છે. જેને લઇને અનેક લોકોના મોત નીપજ્યા છે. આવો જ એક કિસ્સો રાજસ્થાનના કોટા ખાતે સામે આવ્યો છે. જેમાં પ્રખ્યાત બોડી બિલ્ડરનું હાર્ટ એટેકથી મોત નીપજયુ હોવાનું સામે આવ્યું છે. 42 વર્ષીય પ્રેમરાજ અરોરા પોતાનું રૂટિન કામ પતાવી બાથરૂમમાં નાહવા ગયા હતા. આ દરમિયાન લાંબા સમય સુધી બહાર આવ્યો ન હતો. જેને લઈને પરિવારજનો એ તપાસ હાથ ધરતા પ્રેમરાજ બેભાન હાલતમાં જોવા મળ્યો હતો.
બેસ્ટ પાવર લીફ્ટિંગ ઓફ રાજસ્થાનનો એવોર્ડ મળ્યો
આથી તેઓને તાત્કાલિક સારવાર અર્થે હોસ્પિટલ ખસેડાયા હતા. જ્યાં સારવાર મળે તે પહેલાં તેને કાળનો ભેટો થઈ જતા તેઓનું મોત નીપજ્યું હોવાનું ફરજ પરના તબીબે જાહેર કર્યું હતું. મહત્વનું છે કે પ્રેમરાજના મોતને પગલે પરિવારજનોમાં અરેરાટી મચી જવા પામી છે. બીજી બાજુ પ્રેમરાજને કોઈ બીમારી ન હોવાનું પણ સામે આવ્યું છે. પ્રેમરાજને 2012-13 માં બેસ્ટ પાવર લીફ્ટિંગ ઓફ રાજસ્થાનનો એવોર્ડ આપી સન્માનીત કરાયા હતા.
અનેક એવોર્ડ મળ્યા
જ્યારે 2014માં પ્રેમરાજને નાગપુર ખાતે આયોજિત પ્રતિયોગિતામાં મિસ્ટર ઈન્ડિયાનો એવોર્ડ મળ્યો હતો અને ગોલ્ડ મેડલ જીત્યા હતા. તો 2016 અને 18 માં રાજસ્થાન એવોર્ડથી પણ તેમનું સન્માન કરવામા આવ્યું હતું.જાણવા મળતી વિગતો અનુસાર પ્રેમરાજ જીમ ટ્રેનર હતો અને બોડી બિલ્ડીંગ મામલે તેઓને અનેક એવોર્ડ પણ મળ્યા છે. વધુમાં પ્રેમરાજનો સમાવેશ એવા લોકોમાં થતો હતો. જે શરીર બાબતે સખ્ત નિયમોનું પાલન કરતા હતા તથા વ્યસનથી ખૂબ દૂર હતો.
