IPL / SRHનો ઝળહળતો વિજય, 58 બોલમાં મેચ પોતાને નામે, ટ્રેવિસ હેડ-અભિષેક શર્માએ પાડ્યો ખેલ

સનરાઈઝર્સ હૈદરાબાદના બે ખેલાડીઓ ટ્રેવિસ હેડ અને અભિષેક શર્મા આઈપીએલમાં જોરદાર ફોર્મમાં ચાલી રહ્યાં છે. ફરી એક વાર આ બન્ને ખેલાડીઓની આક્રમક ઈનિંગ જોવા મળી. તેમની આક્રમક ઈનિંગને કારણે જ સનરાઇઝર્સ હૈદરાબાદે (SRH) લખનઉ સુપર જાયન્ટ્સ સામે 10 વિકેટે જીત મેળવી હતી. અભિષેક શર્માએ 28 બોલમાં 75 રન, ટ્રેવિસ હેડે 30 બોલમાં 89 રન કર્યાં હતાં જેને કારણે ટીમ ફક્ત 9.4 ઓવરમાં મેચ જીતી લીધી હતી.

ટ્રેવિસ હેડ-અભિષેક શર્માએ ખેલ પાડ્યો

હૈદરાબાદની ઓપનિંગ જોડી ટ્રેવિસ હેડ-અભિષેક શર્માએ 89-75 રન ફટકારીને લખનઉનો ખેલ પાડી દીધો હતો. અગાઉની મેચમાં પણ આ બન્ને ખેલાડીઓની દમદાર રમત જોવા મળી હતી.

વધુ વાંચો : ક્રિકેટ મેચ કે મજાક, 7 બેટ્સમેન 'શૂન્ય' પર પાછા ફર્યા, આખી ટીમ 12 રનમાં સમેટાઇ

166 રનનો ટાર્ગેટ 9.4 ઓવરમાં પૂરો કર્યો

મેચમાં ટોસ જીતીને પ્રથમ બેટિંગ કરતા લખનઉની ટીમે 166 રનનો લક્ષ્યાંક આપ્યો હતો. જવાબમાં હૈદરાબાદે 9.4 ઓવરમાં વિકેટ ગુમાવ્યાં વગર ટાર્ગેટ પૂરો કરીને મોટી જીત મેળવી હતી. હૈદરાબાદે 167 રન કર્યાં હતા.

લખનઉ ટીમ સસ્તામાં ખખડી

ટોસ જીતીને પ્રથમ બેટિંગ કરવા ઉતરેલી લખનઉની ટીમે એક સમયે 66 રનમાં 4 વિકેટ ગુમાવી દીધી હતી. આ પછી આયુષ બદોની અને નિકોલસ પૂરને ટીમને સંભાળી લીધી હતી અને લાજ બચાવી હતી. બડોનીએ 30 બોલમાં 55 રનની જોરદાર અણનમ ઈનિંગ રમી હતી. જ્યારે પૂરને 26 બોલમાં અણનમ 48 રન કર્યા હતા. બડોની અને પૂરણ વચ્ચે 5મી વિકેટ માટે 52 બોલમાં 99 રનની અણનમ ભાગીદારી થઈ હતી.