રિપોર્ટ / 3 વર્ષમાં જ લોકોની નેટ સેવિંગમાં રૂ. 9 લાખ કરોડનો ઘટાડો, કોણ ખાઇ રહ્યું છે ભારતીય પરિવારોના પૈસા?

લોકો સોના, રિયલ એસ્ટેટ અને શેરબજારમાં તેમનું રોકાણ વધારી રહ્યા છે, પરંતુ લોન લેવા અને વિવિધ કાર્યો કરવાને કારણે તેમની નાણાકીય જવાબદારીઓ પણ વધી રહી છે. આ કારણે ચોખ્ખી નાણાકીય બચત (Net Financial Savings) ઘટી રહી છે. રિપોર્ટ અનુસાર છેલ્લા 3 વર્ષમાં પરિવારોની નાણાકીય જવાબદારીઓ બમણીથી વધુ વધી છે અને ચોખ્ખી નાણાકીય બચતમાં લગભગ 40% ઘટાડો થયો અને તે 5 વર્ષમાં સૌથી નીચા સ્તરે આવી ગયો.

જીડીપીમાં ઘરગથ્થુ બચતનો હિસ્સો ઘટીને 5.3%

રિપોર્ટ અનુસાર ભારતીય પરિવારોની ચોખ્ખી બચત ત્રણ વર્ષમાં રૂ. 9 લાખ કરોડથી વધુ ઘટી છે. દેશના જીડીપીમાં ઘરગથ્થુ બચતનો હિસ્સો ઘટીને 5.3% પર આવી ગયો છે, જે 50 વર્ષમાં સૌથી ઓછો છે. આંકડા મંત્રાલય દ્વારા બહાર પાડવામાં આવેલા તાજેતરના ડેટા અનુસાર, નાણાકીય વર્ષ 2022-23માં પરિવારોની ચોખ્ખી બચત ઘટીને 14.16 લાખ કરોડ રૂપિયા થઈ ગઈ હતી, જે 2020-21માં 23.29 લાખ કરોડ રૂપિયા પર પહોંચી ગઈ હતી. આ બચતનો આ આંકડો 5 વર્ષમાં સૌથી નીચો સ્તર છે.

ભારતીય પરિવારો પર બેંકોનું કુલ દેવું વધ્યું

અગાઉ, વર્ષ 2017-18માં ચોખ્ખી બચત રૂ. 13.05 લાખ કરોડ હતી. ભારતીય પરિવારો પર બેંકોનું કુલ દેવું પણ 2022-23માં વધીને રૂ. 11.88 લાખ કરોડ થયું હતું, જે 2021-22માં રૂ. 7.7 લાખ કરોડ હતું.

નાણાકીય સંસ્થાઓ અને નોન-બેંકિંગ નાણાકીય કંપનીઓ દ્વારા પરિવારોને આપવામાં આવેલી લોન પણ નાણાકીય વર્ષ 2020-21માં રૂ. 93,723 કરોડથી ચાર ગણી વધીને 2022-23માં રૂ. 3.33 લાખ કરોડ થઈ છે. નાણાકીય વર્ષ 2021-22માં તે 1.92 લાખ કરોડ રૂપિયા હતું.

વધુ વાંચો: આ કંપનીના IPOનું શેરબજારમાં ધમાકેદાર લિસ્ટિંગ, પહેલા જ દિવસે રોકાણકારોના રૂપિયા થયા ડબલથી વધારે

શેર અને મ્યુચ્યુઅલ ફંડમાં રોકાણમાં વધારો

સાથે જ આ ડેટા બતાવે છે કે 2020-21 થી 2022-23 દરમિયાન, મ્યુચ્યુઅલ ફંડમાં રોકાણ લગભગ ત્રણ ગણું વધીને રૂ. 1.79 લાખ કરોડ થયું હતું, જે 2020-21માં રૂ. 64,084 કરોડ હતું. શેર અને ડિબેન્ચરમાં ઘરો દ્વારા રોકાણ આ સમયગાળા દરમિયાન રૂ. 1.07 લાખ કરોડથી લગભગ બમણું થઈને 2022-23માં રૂ. 2.06 લાખ કરોડ થઈ ગયું છે.