તમારા કામનું / WhatsApp લાવશે Scam Alert ફીચર, ફ્રોડ મેસેજ મળતા જ મળશે એલર્ટ

ઓનલાઈન છેતરપિંડી અને સાયબર ફ્રોડના વધતા બનાવોને ધ્યાનમાં રાખીને WhatsApp એક નવા "Scam Alert" ફીચર પર કામ કરી રહ્યું છે. આ ફીચર શંકાસ્પદ મેસેજને ઓળખીને યુઝર્સને અગાઉથી ચેતવણી આપશે જેથી તેઓ ફ્રોડનો શિકાર બનતા બચી શકે. રિપોર્ટ અનુસાર આ ફીચર ખાસ કરીને અજાણ્યા નંબરોથી આવતા સંભવિત ઠગાઈભર્યા મેસેજને ઓળખવા માટે તૈયાર કરવામાં આવી રહ્યું છે. જો કોઈ મેસેજ શંકાસ્પદ જણાશે, તો WhatsApp સીધું જ ચેટની અંદર યુઝરને એલર્ટ આપશે. સાથે જ એ પણ જણાવશે કે મેસેજ મોકલનાર વ્યક્તિ યુઝરના કોન્ટેક્ટ લિસ્ટમાં નથી.

આવા કિસ્સામાં યુઝર પાસે તે નંબરને બ્લોક અથવા રિપોર્ટ કરવાનો વિકલ્પ રહેશે. જો યુઝરને મેસેજ વિશ્વસનીય લાગે તો તે સામાન્ય રીતે વાતચીત ચાલુ પણ રાખી શકશે.

WhatsAppનું કહેવું છે કે Scam Alert ફીચર સંપૂર્ણપણે યુઝરના ફોનમાં જ કામ કરશે. એટલે કે કોઈપણ મેસેજની તપાસ માટે તેને WhatsApp અથવા Metaના સર્વર પર મોકલવામાં આવશે નહીં. શંકાસ્પદ મેસેજની ઓળખની સમગ્ર પ્રક્રિયા ડિવાઇસમાં જ થશે, જેના કારણે એન્ડ-ટુ-એન્ડ એન્ક્રિપ્શન અને યુઝરની પ્રાઈવસી સુરક્ષિત રહેશે.

આ પણ વાંચોઃ Insta યુઝર્સ એલર્ટ! હેકર્સથી બચીને રહેજો, Meta AIનો થઇ રહ્યો છે મિસયુઝ

રિપોર્ટ મુજબ કંપની એક ટ્રાન્સપેરન્સી ટૂલ પર પણ કામ કરી રહી છે. તેની મદદથી યુઝર્સ જાણી શકશે કે Scam Alert ફીચર ક્યારે અને કયા મેસેજ પર સક્રિય થયું હતું. આ માહિતી પણ સંપૂર્ણપણે ખાનગી રહેશે અને WhatsApp સાથે શેર કરવામાં આવશે નહીં. હાલમાં આ ફીચર ડેવલપમેન્ટ સ્ટેજમાં છે. સૌથી પહેલા તેને બીટા ટેસ્ટર્સ માટે રજૂ કરવામાં આવશે અને ત્યારબાદ ભવિષ્યના અપડેટ્સમાં તમામ યુઝર્સ માટે ઉપલબ્ધ કરાવવામાં આવી શકે છે. આ ફીચર ઓનલાઈન ઠગાઈ સામે યુઝર્સને વધુ સુરક્ષા પૂરી પાડવામાં મહત્વની ભૂમિકા ભજવી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ