દિલ્હી કેપિટલ્સ અને રાજસ્થાન રોયલ્સ વચ્ચેની IPL મેચ બાદ પ્લેઓફની રેસ વધુ રોમાંચક બની ગઈ છે. સીઝનની 56મી મેચમાં રાજસ્થાન રોયલ્સનો દિલ્હી કેપિટલ્સ સામે 20 રને પરાજય થયો હતો. આ જીતે રિષભ પંતની ટીમની પ્લેઓફમાં જવાની આશા પણ જીવંત રાખી છે. આ ઉપરાંત ટીમને પોઈન્ટ ટેબલમાં પણ ફાયદો થયો છે. સાથે જ સિઝનની 56 મેચો પછી પણ એકેય ટીમ પ્લેઓફ માટે ટિકિટ મેળવી શકી નથી.
પોઈન્ટ ટેબલમાં પાંચમા સ્થાને પહોંચી દિલ્હી
ગઇકાલની આ જીત સાથે દિલ્હી પોઈન્ટ ટેબલમાં લખનૌ સુપર જાયન્ટ્સને પછાડી પાંચમા સ્થાને પહોંચી ગયું છે. દિલ્હીના પણ હવે 12 પોઈન્ટ છે, જે હૈદરાબાદ અને લખનૌની બરાબર છે, પરંતુ સનરાઈઝર્સ હૈદરાબાદના સારા નેટ રન રેટને કારણે દિલ્હી તેનાથી થોડું પાછળ છે. જો દિલ્હી તેની આગામી બંને મેચો સારા માર્જિનથી જીતે છે અને હૈદરાબાદ તેની આગામી મેચ હારી જાય છે, તો રિષભ પંતની ટીમ પ્લેઓફ માટે ક્વોલિફાય કરી શકે છે.
ચાર ટીમોના ખાતામાં 12-12 પોઈન્ટ
હાલમાં કોલકાતા નાઈટ રાઈડર્સ આઈપીએલ 2024ના પોઈન્ટ ટેબલમાં ટોચ પર છે, તેના ખાતામાં 16 પોઈન્ટ છે. રાજસ્થાન રોયલ્સના ખાતામાં પણ એટલા જ પોઈન્ટ છે, પરંતુ રાજસ્થાનનો નેટ રન રેટ KKR કરતા સારો નથી. તે જ સમયે, ત્રીજાથી છઠ્ઠા સ્થાન પરની ટીમોના ખાતામાં 12-12 પોઈન્ટ છે, પરંતુ સારા નેટ રન રેટના કારણે, ચેન્નાઈ સુપર કિંગ્સ ત્રીજા સ્થાને છે અને સનરાઈઝર્સ હૈદરાબાદ ચોથા સ્થાને છે. દિલ્હી કેપિટલ્સ પાંચમા સ્થાને પહોંચી ગઈ છે, જ્યારે લખનૌ સુપર જાયન્ટ્સને એક સ્થાન સરકીને છઠ્ઠા સ્થાને જવું પડ્યું છે.
ગત વર્ષની ફાઇનલિસ્ટ ગુજરાત ટાઇટન્સ છેલ્લા સ્થાને
IPL 2024 પોઈન્ટ ટેબલમાં રોયલ ચેલેન્જર્સ બેંગ્લોર હાલમાં સાતમા સ્થાને છે, જ્યારે પંજાબ કિંગ્સ આઠમા સ્થાને છે. મુંબઈ ઈન્ડિયન્સ ભલે પાંચ વખત ચેમ્પિયન હોય, પરંતુ આ સિઝનમાં તે નવમા સ્થાને છે. એટલું જ નહીં ગત વર્ષની ફાઇનલિસ્ટ ગુજરાત ટાઇટન્સ છેલ્લા સ્થાને છે.
મુંબઈ ઈન્ડિયન્સ આ સિઝનમાં વધુમાં વધુ 12 પોઈન્ટ મેળવી શકે છે, જ્યારે RCB, PBKS અને ગુજરાત પાસે 14 પોઈન્ટ સુધી પહોંચવાની તક છે. આ સાથે જ દિલ્હીએ આ મેચ જીતીને પ્લેઓફની રેસમાં પોતાને જીવંત રાખી છે.
