VTV EXCLUSIVE / ગુજરાતમાં નવા ચીફ સેક્રેટરી માટે આ નામો ચર્ચામાં, PMO જ મારશે અંતિમ મહોર!

• ગાંધીનગરમાં નવા ચીફ સેકેટરી માટે ચર્ચા ગરમ 
• PMO જ છેલ્લો નિર્ણય લેશે : સૂત્ર 
• ગુજરાતમાંથી જ CS બને તો બે જ નામ રેસમાં 

ગુજરાત સરકારમાં બ્યૂરોક્રસીનાં બોસ અનિલ મુકીમ હવે પોતાના પદ પરથી વિદાય લેવા જઈ રહ્યા છે. રાજ્યના ઈતિહાસમાં મુકીમ પહેલા એવા ચીફ સેક્રેટરી છે કે જેમને એક નહીં બે-બે વાર CSનાં પદે એક્સટેન્શન આપવામાં આવ્યું. મુકીમે વર્ષ 2019માં JN સિંઘ બાદ ચાર્જ સંભાળ્યો હતો અને તે બાદ તેઓ 2020માં જ ઓગસ્ટ મહિનામાં તેઓ નિવૃત્ત થવાના હતા, જોકે મુકીમ સરકારનાં ટોપ લીડર્સની ખૂબ જ નજીકના અધિકારી હોવાના કારણે તેમને બે વાર એક્સટેન્શન આપવામાં આવ્યું. 

હજુ પણ મુકીમને જ રખાશે? ગુજરાતમાંથી બે નામો રેસમાં 
હવે જ્યારે મુકીમનો કાર્યકાળ સમાપ્ત થવા જઈ રહ્યો છે ત્યારે ગુજરાતમાં અમલદારશાહીનાં નવા નાયક માટે પાવર કોરીડૉરમાં હલચલ વધી ગઈ છે. જોકે હવે જોવાનું એ રહે છે કે રૂપાણી સરકાર ફરીથી મુકીમને એક્સટેન્શન આપે છે કે પછી 1986ની બેચમાંથી નવા ચીફ સેક્રેટરીની નિમણૂક કરવામાં આવે છે. જો નવા ચીફ સેક્રેટરીની નિમણૂક કરવામાં આવે તો મુખ્યત્વે બે નામો રેસમાં સૌથી આગળ છે. પંકજ કુમાર અને રાજીવ કુમાર ગુપ્તા.

પંકજ કુમાર 
પંકજ કુમારનાં પ્લસ પોઈન્ટની વાત કરીએ તો બેચમાં તેઓ જ સૌથી વધારે સિનિયર છે અને અત્યારે ગૃહમંત્રાલયમાં એડિશનલ ચીફ સેક્રેટરી તરીકે ફરજ બજાવી રહ્યા છે. 

રાજીવ કુમાર ગુપ્તા
જ્યારે રાજીવ કુમાર ગુપ્તાની વાત કરવામાં આવે તેઓ પણ 1986 બેચના છે અને વર્તમાનમાં ઈન્ડસ્ટ્રીઝ & માઈન્સ વિભાગમાં એડિશનલ ચીફ સેક્રેટરીનું પદ સંભાળી રહ્યા છે. વધુમાં ગુજરાત સરકારની મહત્વકાંક્ષી યોજના ગણાતી સરદાર સરોવર પ્રોજેક્ટમાં તેમની પાસે જ MDનો ચાર્જ પણ છે. 

PMO જ લેશે અંતિમ નિર્ણય! 
જોકે VTVના સૂત્રો અનુસાર ગુજરાતમાં આગામી ચીફ સેક્રેટરીની નિમણૂકનો નિર્ણય મહદંશે દિલ્હીમાં PMO પર નિર્ભર રહેશે. મુકીમ હજુ વધારે એક્સટેન્શન આપવું કે નહીં અને જો ન અપાય તો આગામી CSની નિમણૂકનો નિર્ણય પણ PMO પર નિર્ભર રહેશે. સૂત્રોનો દાવો છે કે જો મુકીમને ગુજરાતમાં ન રખાય તો કેન્દ્રમાં મોટું પદ પણ અપાઈ શકે છે. 

સૂત્રો અનુસાર દિલ્હીથી નવા અધિકારીની પેરાશૂટ લેન્ડિંગ થાય તોય નવાઈ નહીં 
જોકે ગુજરાતમાંથી જ કોઈ નવા ચીફ સેક્રેટરી બને છે કે પછી દિલ્હીમાંથી કોઈ અધિકારીનું પેરાશૂટ લેન્ડિંગ કરાવવામાં આવે છે તે કોઈ જાણતું નથી.