પાટણઃ ઉત્તરગુજરાતની સૌથી મોટી યુનિવર્સિટી એવી પાટણની હેમચંદ્રાચાર્ય ઉત્તરગુજરાત યુનિવર્સિટી છેલ્લા કેટલાય સમયથી વિવાદોથી ઘેરાયેલી છે. યુનિવર્સિટી આંતરિક રાજકારણને કારણે ચર્ચાઓમાં રહી છે. ત્યારે પાટણના ધારાસભ્ય કિરીટ પટેલનો ભાઈને સસ્પેન્ડ કરવામાં આવતા શિક્ષણજગતનું રાજકારણ ગરમાયું છે.
સંસ્કૃત ભવનમાં ફરજ બજાવતા કોંગ્રેસના ધારાસભ્ય કિરીટ પટેલના ભાઈ ડોક્ટર દિલીપ પટેલને બોગસ ડિગ્રી મુદ્દે સસ્પેન્ડ કરવામાં આવ્યા છે. યુનિવર્સિટીને દિલીપ પટેલ વિરુદ્ધ પુરાવા મળતા કારોબારી બેઠકમાં સસ્પેન્ડ કરવાનો નિર્ણય કરવામાં આવ્યો છે. દિલીપ પટેલને સસ્પેન્ડ કર્યા બાદ યુનિવર્સિટીમાં કાયદો અને વ્યવસ્થા ન જોખમાઈ તે માટે પોલીસનો કાફલો યુનિવર્સિટીમાં ખડકી દેવામાં આવ્યો છે.
વિવાદીત યુનિવર્સિટી?
થોડા સમય અગાઉ પાટણ કોંગ્રેસના ધારાસભ્ય કિરીટ પટેલ યુનિવર્સિટીમાં મળતીયાઓ દ્વારા પૈસા લેવામાં આવી રહ્યા છે તેવો ઓડિયો વાયરલ કરીને ચોકાવી દીધા હતા. ત્યારબાદ યુનિવર્સિટીના કુલપતિ બીએ પ્રજાપતિ ઉપર એસીબીમાં ફરિયાદ કરી કુલપતિને બે ફૂટ ઉપર લાવી દીધા હતા. તો પાસ પાટીદારના કાર્યકરોએ કુલપતિના મોઢા ઉપર શાહી ફેંકીને શિક્ષણ જગતને ખુલો પડકાર ફેંક્યો હતો. આમ આવા અનેક વિવાદો પાટણની એચએનજીયુ યુનિવર્સિટી સાથે જોડાયેલા છે.
અસલી પ્રોફેસરની નકલી ડીગ્રી
યુનિવર્સિટીના કુલપતિ બીએ પ્રજાપતિએ તેમજ કારોબારીની બેઠકમાં આજ રોજ એક એવો નિર્ણય લેવાયો કે સમગ્ર શિક્ષણ જગતમાં ચકચાર મચી જવા પામી છે. યુનિવર્સિટી આજરોજ પાટણ કોંગ્રેસના ધારાસભ્ય કિરીટ પટેલના ભાઈ ડૉક્ટર દિલીપ પટેલને યુનિવર્સિટીમાં સંસ્કૃત વિભાગમાં પ્રોફેસર તરીકે બોગસ ડિગ્રી ધારણ કરી ફરજ બજાવતા હતા. જેની હકીકત સામે આવતા યુનિવર્સિટીના કારોબારીમાં પ્રોફેસર દિલીપ પટેલને યુનિવર્સિટીમાંથી સસ્પેન્ડ કરવામાં આવ્યા આવ્યા હતા. દિલીપ પટેલ ઉપર આરોપ લાગ્યા હતા કે જેમણે પોતાની ભરતી પ્રક્રિયા વખતે જે સર્ટિફિકેટ આપ્યા છે જેમાં ઘણા સર્ટિફિકેટ પ્રાથમિક ધોરણે ફર્જી લાગતા પટેલને સસ્પેન્ડ કરવામાં આવ્યા છે.
ધારાસભ્ય કિરીટ પટેલની પ્રતિક્રિયા
તો કોંગ્રેસના ધારાસભ્ય કિરીટ પટેલે મીડિયા સાથેની વાતચીતમાં જણાવ્યું હતું કે કુલપતિ પોતે ભ્રષ્ટાચારી છે અને અનેકવાર તેમની પર ભ્રષ્ટાચારના આરોપ લાગ્યા છે. મારા ભાઈની ભરતી પ્રક્રિયામાં કાંઈ ખોટું નથી થયું. તેમણે વધુમાં કહ્યું કે મને ભાજપમાં જોડાઇ જવા માટે દબાણ કરવાના ભાગરૂપે મારા ભાઈ ઉપર આ કાર્યવાહી કરવામાં આવી છે.