બાળકની કસ્ટડીના એક કેસની સુનાવણી કરતા સુપ્રીમ કોર્ટે એવું કહ્યું કે બાળકનો અધિકાર છે કે તેને માતા અને પિતા બન્નેનો પ્રેમ મળે.
રાજસ્થાનના શખ્સની અરજી પર સુપ્રીમમાં સુનાવણી
સુપ્રીમે કહ્યું, માતાપિતાનો પ્રેમ અને વહાલ મળે તો બાળક સૌથી વધારે સુખી
બાળકને માતા અને પિતા બન્નેનો પ્રેમ મળવો જોઈએ
ફેમિલી કોર્ટે બાળકની કસ્ટડીની પિતાની અરજી ફગાવી હતી
પિતાએ ફેમિલી કોર્ટના ચુકાદાને સુપ્રીમમાં પડકાર્યો
લગ્નજીવનમાં અણબનાવને કારણે અલગ પડેલા પતિ અને પત્ની માટે સુપ્રીમનો એક મહત્વનો ચુકાદો આવ્યો છે. વિવાદ થતા અલગ પડેલા પતિ અને પત્નીમાંથી બાળકની કસ્ટડી કોની તેને લઈને આવેલા એક કેસની સુનાવણી વખતે સુપ્રીમ કોર્ટે એક મહત્વની ટીપ્પણી કરી છે. સુપ્રીમના જસ્ટિસ ઈન્દીરા બેનરજીએ એવું કહ્યું કે બાળકને માતા અને પિતા એમ બન્નેનો પ્રેમ મળવો જોઈએ અને આ તેનો અધિકાર છે. માતાપિતાના વિવાદને કારણે અલગ પડેલા બાળકને રાહત આપતા કોર્ટે કહ્યું કે માતાપિતાએ તેમના બાળકને પૂરતો પ્રેમ આપવો જોઈએ અને આવું કરવું તેનો અધિકાર છે.
બાળકને પિતાના પ્રેમમાંથી વંચિત ન રાખી શકાય-કોર્ટ
જસ્ટિસે કહ્યું કે કમનસીબે, માતાપિતા તેમના મતભેદો ઉકેલવામાં અને સાથે રહેવામાં અસમર્થ છે. તે ગમે તે હોય, બાળકને માતાપિતા બંને સુધી પહોંચવાનો અને માતાપિતા બંનેનો પ્રેમ અને સ્નેહ મેળવવાનો અધિકાર છે. પતિ-પત્ની વચ્ચે ગમે તે તફાવત હોય, બાળકને તેના પિતાની સંગતથી વંચિત ન રાખી શકાય.
મહામારીને કારણે કોઈને પુત્રને મળતો ન અટકાવી શકાય
ખંડપીઠે નોંધ્યું હતું કે કોરોના મહામારી કોઈ શખ્સને તેના પુત્રને મળતો અટકાવવા અડચણ ન બનવી જોઈએ. સુપ્રીમ કોર્ટે આદેશમાં જણાવ્યું હતું કે, "દેશમાં કોવિડ -19 પરિસ્થિતિમાં સુધારો થયો છે અને જીવન વધુ કે ઓછું સામાન્ય થઈ ગયું છે" તેથી ફેમિલી કોર્ટ સમક્ષ બાળકની કસ્ટડીનો કેસ ફરી શરુ થયો હતો.
પિતાએ બાળકની કસ્ટડી લેવા કરી હતી અરજી
રાજસ્થાનના એક શખ્સને પત્ની સાથે બનતું નહોતું આથી તેઓ અલગ પડ્યાં હતા, પરંતુ તેમનું બાળક તેની માતા સાથે રહેતું હતું, પિતાએ બાળકની કસ્ટડી લેવા પહેલા ફેમિલી કોર્ટમાં અરજી કરી હતી પરંતુ ફેમિલી કોર્ટ તેમની અરજી ફગાવી હતી આથી તેમણે હાઈકોર્ટમાં અપીલ કરી હતી, હાઈકોર્ટે પણ અરજી ફગાવાતા તેમણે સુપ્રીમમાં અરજી કરી હતી.