સુરતના સારોલીમાં બિલ્ડરે અપશબ્દો બોલીને મહિલાને ઢોર માર મારતા મહિલાએ પુણા પોલીસ ચોકીમાં બિલ્ડરની સામે ફરિયાદ નોંધાવી છે.
સુરતના સારોલી વિસ્તારમાં બિલ્ડરે મહિલાને માર્યો માર
સારોલી અયોધ્યા માર્કેટમાં મહિલાએ ખરીદી છે દુકાન
પુણા પોલીસ ચોકીમાં બિલ્ડર સામે ફરિયાદ
સુરત શહેરમાં ગુનાઓનું પ્રમાણ સતત વધી રહ્યું છે. એમાં પણ ખાસ કરીને મહિલાઓ પર અત્યાચાર, છેડતી જેવી ઘટના સતત વધી રહી છે. ગુનેગારો કાયદાને ઘોળીને પી ગયા હોય તેવા દ્રશ્યો સામે આવી રહ્યા છે. ત્યારે સુરતમાં વધુ એક શર્મજનક ઘટના બની છે. શહેરના સારોલી વિસ્તારમાં બિલ્ડરે અપશબ્દો બોલીને મહિલાને ઢોર માર માર્યો છે. જેનો વીડિયો સોશિયલ મીડિયામાં વાયરલ થયો છે.
અપશબ્દો બોલીને મહિલાને માર્યો ઢોર માર
મળતી માહિતી અનુસાર, શહેરના સારોલી વિસ્તારમાં આવેલી અયોધ્યા ટેક્સટાઈલ માર્કેટમાં રશ્મીબેન વિજયકુમાર ધામેલિયા નામની એક મહિલાએ દુકાન ખરીદી હતી. જેના ભાડા અંગે તેઓ પતિ સાથે બિલ્ડરની પાસે રજૂઆત કરવા માટે ગયા હતા. આ દરમિયાન બિલ્ડર ઉશ્કેરાઈ ગયો હતો અને અપશબ્દો બોલીને મહિલાને ઢોર માર મારવા લાગ્યા હતો. બિલ્ડરને જાણે કોઈનો ડર જ ન હોય એ રીતે મહિલા પર લોખંડના રોડથી હુમલો કર્યો હતો.
ભાડા અંગે વાત કરતા ઉશ્કેરાઈને મને માર્યો મારઃ પીડિત મહિલા
આ અંગે પીડિત મહિલાએ જણાવ્યું કે, 'અમે લોન કરાવીને અયોધ્યા ટેક્સટાઈલ માર્કેટમાં દુકાન લીધી હતી. દુકાન લેતી વખતે બિલ્ડરે કહ્યું હતું કે તમે પૂરા પૈસા ચૂકવી દો, જ્યાં સુધી દુકાન બની ન જાય ત્યાં સુધી ભાડા તરીકે તમને દર મહિને 30 હજાર રૂપિયા આપવામાં આવશે. થોડાક મહિના સુધી બિલ્ડરે ભાડુ નિયમિત આપ્યું હતું. જે બાદ બિલ્ડરે ફોન ઉપાડવાનું બંધ કરી દીધું. તેથી અમે રૂબરૂ તેમને મળવા ગયા હતા. આ દરમિયાન બિલ્ડરે ઉશ્કેરાઈને લોખંડના સળિયા વડે માર માર્યો.' આ મામલે મહિલાએ પુણા પોલીસ ચોકીમાં બિલ્ડર સામે ફરિયાદ નોંધાવી છે. હવે જોવાનું એ રહેશે કે મહિલાને ઢોર માર મારવા બદલ બિલ્ડર પર પોલીસ કેવા પ્રકારની કાર્યવાહી કરે છે.