અમેરિકાની દવા બનાવતી કંપની મોડર્ના કોરોના વાયરસની વેક્સીનના લેટ સ્ટેજ ટ્રાયલની તૈયારી કરી રહી છે અને રશિયાએ વેક્સિન વિક્સિત કરાવા માટે કમરકસી હતી. ત્યારે ભારત માટે પણ એક ખુશખબર આવ્યા છે. ICMRના ડોક્ટરે ગઇકાલે કહ્યું હતું કે, કોવિડ-19 માટે બે દેશી વેક્સિનનું ટ્રાયલ આગળ વધી રહ્યું છે. આ ઉંદર અને સસલા પર તેની ટોક્સિસિટી સ્ટડી સફળ રહી છે. આ બંન્ને વેક્સિનને માણસો પર પરીક્ષણ કરવાની મંજૂરી મળી ગઇ છે. ICMRની સાથે ગુજરાતની એક કંપની ઝાયડસ કેડિલા પણ રસી પર કામ કરી રહી છે.
કોવિડ-19 માટેની વેક્સિનનું ક્લિનિકલ ટ્રાયલ શરૂ
ZyCoV-D વેક્સિનનું હ્યુમન ક્લિનિકલ ટ્રાયલ શરૂ કર્યુ
સમગ્ર દેશ અને વિશ્વ કોરોનાની વેક્સિનની રાહ જોઇ રહ્યું છે. તેવામાં ભારત સરકારનું માનવું છે કે આગામી મહિનાના મધ્યગાળા સુધીમાં કોવિડ વેક્સિન આવી જશે. તેની સાથે જ દેશમાં કોરોના મહામારીના અંતની શરૂઆત થશે. ભારતની પહેલી કોરોના વેક્સિન કોવાક્સિન (Covaxin) બાદ હવે દેશની બીજી કોરોના વેક્સિનના માનવ પરીક્ષણની શરૂઆત થઈ ગઈ છે.
ગુજરાતની કંપની ઝાયડસ કેડીલાએ કોરોના વેક્સિનનું હ્યુમન ટ્રાયલ શરૂ કર્યુ છે. રસીની સલામતી, રોગપ્રતિકારક શક્તિનું મૂલ્યાંકન કરવામાં આવશે. ઝાયડસ કેડીલાને ટ્રાયલ માટે સ્થાનિક કક્ષાએથી મંજૂરી મળી છે.
ભારતીય દવા કંપની ઝાયડસ કેડિલા (Zydus Cadilla)એ બુધવારે કરેલી જાહેરાત અનુસાર તેમણે એક સંભવિત કોરોના વેક્સિન માટે હ્યુમન ટ્રાયલ શરૂ કરી દીધું છે. ઝાયડસ કેડિલાના કહેવા અનુસાર, ZYCoV-D, પ્લાઝમા ડીએનએ વેક્સિન સુરક્ષિત માનવામાં આવી છે. અગાઉ કોરોના વેક્સિનના ક્લીનિકલ ટ્રાયલમાં પ્રતિકારક શક્તિ અને ઈમ્યુનિટી ટેસ્ટના સારા પરિણામો સામે આવ્યા છે.
ઝાયડસ કેડિલા પોતાની કોરોના વેક્સિન ZYCoV-Dના હ્યુમન ટ્રાયલમાં 1,000થી પણ વધારે લોકોને સામેલ કરવામાં આવશે. આ માટે ભારતમાં અનેક ક્લીનિકલ રિસર્ચ સેન્ટર પણ સ્થાપવામાં આવ્યા છે. અગાઉ બે જુલાઈના રોજ ભારત બાયોટેકની 'કોવાક્સિન' (COVAXIN) બાદ હૈદરાબાદ ખાતેની ફાર્માસ્યુટિકલ કંપની ઝાયડસ કેડિલા હેલ્થકેર લિ. પણ કોવિડ-19 વેક્સિન બનાવવાની વાત કરી રહી છે. ત્યાર બાદ ડ્રગ કંટ્રોલર જનરલ ઓફ ઈંડિયાએ ઝાયડસ કેડિલાને આ વેક્સિનના માનવ પરીક્ષણની મંજૂરી પણ આપી દીધી છે. આ સાથે જ માનવ પરીક્ષણ માટે મંજૂરી મેળવનારી ઝાયડસ કેડિલા દેશની બીજા નંબરની કંપની બની ગઈ છે. હજુ તાજેતરમાં જ હૈદરાબાદની ભારત બાયોટેકને પણ આવા જ ટ્રાયલની મંજૂરી મળી હતી.
ઉંદર અને સસલા પર પરીક્ષણ સફળ રહ્યું
ભારતની આ બે કંપનીઓ અલગ અલગ જગ્યાએ હજાર-હજાર લોકો પર વેક્સિનને લઈ ક્લિનિક્લ સ્ટડી કરી રહ્યા છે. તેઓ ઉંદર અને સસલા પર પરીક્ષણ કરી ચુકી છે. જેની ટોક્સિસિટી સ્ટડી સફળ રહી છે.
15મી ઓગષ્ટના રોજ લોન્ચ થશે દેશની પહેલી કોરોના વેક્સિન
જો વેક્સિન બનશે તો 15મી ઓગષ્ટના રોજ વડાપ્રધાન નરેન્દ્ર મોદી લાલ કિલ્લા પરથી કોરોનાની સ્વદેશી વેક્સિન લોન્ચ કરી શકે છે. ICMR અને ભારત બાયોટેકની ભાગીદારીથી તૈયાર થઈ રહેલી આ વેક્સિનના પ્રાણીઓ પરના પરીક્ષણ સંપૂર્ણપણે સફળ રહ્યા છે અને તેની હ્યુમન ટ્રાયલ ચાલી રહી છે. આ વેક્સિન બને તેટલી ઝડપથી લોન્ચ કરી શકાય તે માટે ICMRએ ટ્રાયલ માટે પસંદ કરવામાં આવેલી તમામ સંસ્થાઓને નિશ્ચિત સીમાની અંદર તેનું પાલન કરવા સખત નિર્દેશ આપ્યો છે. જો આગામી 15 ઓગષ્ટના રોજ આ વેક્સિન લોન્ચ થશે તો તે વિશ્વની પ્રથમ કોરોના વેક્સિન બનશે.