PMના ફિટનેશ વીડિયોમાં નથી થયો કોઈ ખર્ચ RTIમાં થયો ખુલાસો

નવી દિલ્હી: પ્રધાનમંત્રી નરેદ્ર મોદીના ફિટનેશ વીડિયો પર PMOએ જવાબ આપતા કહ્યું કે આ વીડિયો પાછળ એક પણ રૂપિયાનો ખર્ચ થયો નથી. આ વીડિયો વિશ્વ યોગ દિવસ પહેલાં 13મી જૂને પીએમે ટ્વીટર પર શેર કર્યો હતો. જેમાં તેઓ ચટ્ટાઈ પર પીઠના બળે યોગ કરતા નજરે પડયા હતા. 

એમને કાળા રંગનો જોગિંગ પોશાક પહેરી રાખ્યો હતો. પ્રધાનમંત્રી મોદીએ ભારતીય ક્રિકેટ ટીમના કેપ્ટન વિરાટ કોહલીના એક પડકારને સ્વીકાર કર્યાના થોડાક દિવસ બાદ આ વીડિયો જારી કર્યો હતો. કોંગ્રેસ સાંસદ શશી થરૂરે દાવો કર્યો છે કે આ વીડિયો બનાવવા પાછળ કુલ રૂ. 35 લાખનો ખર્ચ કરવામાં આવ્યો છે. તો સરકારે આ દાવાનો નકાર્યો છે. 

પીએમ મોદીના આ ફિટનેશ વીડિયો મામલે એક RTIના જવાબમાં PMOએ ખુલાસો કર્યો છે. PMO દ્વારા RTIના જવાબમાં કહેવામાં આવ્યું છે કે આ વીડિયો પ્રધાનમંત્રી નિવાસ સ્થાને બનાવવામાં આવ્યો છે અને તેની પાછળ એક પણ રૂપિયાનો ખર્ચ થયો નથી. આની વીડિયો ગ્રાફી PMOના કેમેરામેને કરી હતી અને કોઈ પણ જાતનો ખર્ચ થયો નથી.  

જો કે આ પહેલા પણ કેન્દ્રીય મંત્રી રાજ્યવર્ધન સિંહ રાઠોડ પણ પીએમ મોદીના ફિટનેસ વીડિયો પર 35 લાખ રૂપિયા ખર્ચ થવાના દાવાને ફગાવી ચૂક્યા છે. ફિટનેસ વીડિયો પર ખર્ચને લઇને કોંગ્રેસ નેતા શસિ થરૂર અને કેન્દ્રીય મંત્રી રાઠોડની વચ્ચે ટ્વિટર પર નોકજોખ જોવા મળી હતી.