વેક્સિન / ગુજરાતની આ કંપની ટૂંક સમયમાં વેક્સિન કરશે લોન્ચ, કંપનીને ઈમર્જન્સી અપ્રુવલ મળે તેવી પૂરી શક્યતા

• ઝાયકોવ-ડી વેક્સિનને મળી શકે છે ઈમર્જન્સી અપ્રૂવલ 
• ઝાયડસ કેડિલા કંપનીએ બનાવી છે ઝાયકોવ-ડી વેક્સિન 
• વેક્સિનને ત્રણ ડોઝમાં લોકોને આપવામાં આવશે 

ઝાયડસ કેડિલાની કોરોના વેક્સિન ઝાયકોવ-ડીને આ અઠવાડિયામાં ઈમર્જન્સી અપ્રૂવલ મળી શકે છે. જો આ વેક્સિનને મંજૂરી મળી તો આ વેક્સિન વિશ્વની પ્રથમ DNA બેઝ્ડ વેક્સિન હશે. વેક્સિનને અપ્રુવલ મળ્યા બાદ આપણા દેશમાં હવે કુલ 4 વેક્સિન ઉપલબ્ધ થઈ જશે. અત્યાર સુધી કોવિશીલ્ડ, કોવેક્સિન અને સ્પુતનિક-V રસી ભારતમાં ઉપલબ્ધ છે. પરંતુ હવે ટૂકમાં ઝાયડસની ઝાયકોવ-ડી પણ લોકોને મળી રહેશે. 

વેક્સિનના ત્રણ ડોઝ આપવામાં આવશે 

આ વેક્સિન બીજી બધી વેક્સિન કરતા અલગ છે. આ વેક્સિનના એક કે બે નહી પરંતુ ત્રણ ડોઝ લોકોને આપવામાં આવશે. આપને જાણીને નવાઈ લાગસે કે ઝાયકોવ-ડી દુનિયાની પ્રથમ DNA બેઝ્ડ વેક્સિન છે. કંપની દ્વારા  એવો દાવો કરવામાં આવ્યો છે કે આ રસીના ત્રણ ડોઝ લેવાથી ઈમ્યૂનિટી વધારે સમય સુધી સ્ટ્રોંગ રહેતી હોય છે. 

જેટ ઈન્જેક્ટરથી વેક્સિન આપવામાં આવશે

આપને જણાવી દઈએ કે ઝાયકોવ-ડી વેક્સિનને જેટ ઈન્જેક્ટરથી લગાવામાં આવશે. આ વેક્સિન નિડલ ફ્રી વેક્સિન છે. જેટ ઈન્જેક્ટરનો ઉપયોગ અમેરિકામાં સૌથી વધારે થતો હોય છે. તેના ઉપયોગથી દવા મસલ્સમાં જાય છે. બીજી એક ખાસ વાત એ છે કે જેટ ઈન્જેક્ટરથી વેક્સિન લગાવાને કારણે પીડા પણ ઓછી થશે. 

1960માં થઈ હતી જેટ ઈન્જેક્ટરની શોધ 

જેટ ઈન્જેક્ટરમાં પ્રેશર માટે કમ્પ્રેસ્ડ ગેસ કે સ્પ્રિંગનો ઉપયોગ થયો હોય છે. જેના કારણે નિડલવાળા ઈન્જેકશનની તુલનામાં ઈન્ફેકશન ફેલાવાનું જોખમ પણ ઘણું ઓછું રહે છે. સૌથી પહેલા આ ડિવાઈસ 1960માં શોધવામાં આવ્યું હતું. પરંતુ 2013માં વિશ્વ સ્વાસ્થ્ય સંગઠન દ્વારા તેના ઉપયોગ માટે મંજૂર આપવામાં આવી હતી. 

અમેરિકામાં જેટ ઈન્જેક્ટરનો સૌથી વધારે ઉપયોગ

ખાસ કરીને અમેરિકા જેવા દેશોમાં જેટ ઈન્જેક્ટરનો ઉપયોગ થાય છે. તેઓ 2014થી તેનો ઉપયોગ કરતા આવ્યા છે. યુરોપ, આફ્રિકા અને એશિયાના કેટલાક દેશોમા પણ જેટ ઈન્જેક્ટરનો ઉપોયગ કરવામાં આવે છે. ફાર્મજેટ, સ્પિરિટ ઈન્ટરનેશનલ, એન્ટરિસ ફાર્મા જેવી કંપનીઓ દ્વારા જેટ ઈન્જેક્ટર બનાવામાં આવે છે. 

ફેઝ-3નો ટ્રાયલ ડેટા એનાલિસિસ તૈયાર 

ઝાયકોવ-ડીના ઈમર્જન્સી અપ્રુવલ માટે ઝાયડસ કેડિલા એટલા માટે અરજી કરી શકે છે. કારણકે આ વેક્સિનના ફેઝ-3નો ટ્રાયલ ડેટાનો એનાલિસિસ પણ તૈયાર છે. કંપની દ્વારા સરકારને પણ આ મુદ્દે જાણકારી આપી દેવામાં આવી છે. હાલ આ વેક્સિનનો ટેસ્ટ પુખ્ત વયના લોકો સિવાય 12 થી 18 વર્ષના બાળકો ઉપર કરવામાં આવી રહ્યો છે. ઉપરાંત ગંભીર બીમારીઓ ધરાવતા લોકો પર પણ આ વેક્સિનનો ટેસ્ટ કરવામાં આવી રહ્યો છે. 

જુલાઈમાં વેક્સિનનું ઉત્પાદન શરૂ થશે 

કંપનીને એવી આશા છે કે જુલાઈ સુધીમાં તેમને અપ્રુવલ મળી જશે. જેથી જુલાઈ સુધીમાં કંપની મોટા પ્રમાણમાં વેક્સિનનું ઉત્પાદન પણ શરૂ કરી દેશે. દર મહિને કંપની દ્વારા 2 કરોડ વેક્સિનના ડોઝનું ઉત્પાદન કરવામાં આવશે. સાથેજ કંપની દ્વારા એવો દાવો પણ કરવામાં આવ્યો છે કે વેક્સિન થોડાકજ દિવસોમાં બજારમાં મળી રહેશે. 

25 ડિગ્રી તાપમાનમાં પણ વેક્સિન નહી બગડે 

શરીરમાં ઈમ્યુનિટીને વધારવા આ વેક્સિનમાં જેનેટિક મટીરીયલનો ઉપયોગ કરવામાં આવ્યો છે. બાકીની વેક્સિનની તુલનામાં આ વેક્સિનની જાળવણી રાખવી પણ સરળ છે. તેને 2 થી 8 ડિગ્રી તાપમાનમાં સ્ટોર કરી શકાય છે. જોકે તેને 25 ડિગ્રી તાપમાનમાં રાખશો તો પણ વેક્સિન ખરાબ નથી થતી.

દરેક ડોઝ વચ્ચે 4 દિવસનું અંતર 

ઉલ્લેખનીય છે કે આ વેક્સિનના ત્રણ ડોઝ આપવામાં આવે છે. જેમા પહેલા ડોઝ પછી બીજો ડોઝ 28 દિવસ પછી આપવામાં આવે છે. બાદમાં ત્રીજો ડોઝ પણ 28 દિવસના અંતરે લગાવામાં આવે છે. એટલેકે દરેક ડોઝના અંતરમાં 4 અઠવાડિયાનું અંતર રાખવામાં આવ્યું છે.