ટીમ ઇન્ડિયાના જાદૂઇ સ્પિનર યુઝવેન્દ્ર ચહલનું ઇન્સ્ટાગ્રામ એકાઉન્ટ હેક થઇ ગયું છે. તેની ખાનગી ચેટનો સ્ક્રીનશોટ પણ સોશિયલ મીડિયા પર લીક થયો છે.
યુઝવેન્દ્ર ચહલનું ઇન્સ્ટાગ્રામ એકાઉન્ટ હેક
ખાનગી ચેટના સ્ક્રીનશોટ થયા લીક
હેકર્સે આ બધું પોતાના પ્લેટફોર્મ પર અપલોડ કર્યું
ટીમ ઇન્ડિયાના સ્ટાર સ્પિનર બોલર યુઝવેન્દ્ર ચહલ હાલ વિરામ પર છે. ચહલ વેસ્ટ ઈન્ડિઝ પ્રવાસમાં ટીમ ઈન્ડિયાની રમતમાં નથી. ત્યારે હાલ આ બધાની વચ્ચે યુઝવેન્દ્ર ચહલનું ઇન્સ્ટાગ્રામ એકાઉન્ટ હેક થઇ ગયું છે, આ ઘટનાની જાણકારી એકાઉન્ટ હેકરે ટ્વીટ દ્વારા આપી છે, એટલું જ નહીં તેની પ્રાઇવેટ ચેટનો સ્ક્રીનશોટ પણ જાહેર કરવામાં આવ્યો છે, જે વાયરલ થઇ રહ્યો છે.
યુઝવેન્દ્ર ચહલનું ઇન્સ્ટાગ્રામ એકાઉન્ટ હેક
યુઝવેન્દ્ર ચહલનું ઇન્સ્ટાગ્રામ એકાઉન્ટ બીજા કોઈએ નહીં પરંતુ તેની આઈપીએલ ટીમ રાજસ્થાન રોયલ્સે હેક કર્યું છે. જો કે આ બધું મજાકમાં કરવામાં આવ્યું છે.( આ માત્ર એક MEME બનાવવામાં આવ્યું છે જેનો ઉદ્દેશ માત્ર મનોરંજનનો જ છે) રાજસ્થાન રોયલ્સે ટ્વિટ કરીને કહ્યું કે, યુઝવેન્દ્ર ચહલનું ઇન્સ્ટાગ્રામ એકાઉન્ટ હેક થયું છે. તેણે એક ફોટો પણ શેર કર્યો છે, જેમાં યુજવેન્દ્ર ચહલની પ્રાઇવેટ ચેટનો સ્ક્રીનશોટ નજરે પડી રહ્યો છે.
ચહલની ખાનગી ચેટ લીક
રાજસ્થાન રોયલ્સે ટ્વિટર પર યુઝવેન્દ્ર ચહલની ચેટનો સ્ક્રીનશોટ શેર કર્યો છે, જેમાં તેની પત્ની ધનશ્રી વર્મા, સંજુ સેમસન, મહેન્દ્રસિંહ ધોની, જોસ બટલર, ભારતીય ક્રિકેટ ટીમ અને રોહિત શર્માના એકાઉન્ટ પરથી છેલ્લા મેસેજ જોવા મળી રહ્યા છે. યુઝવેન્દ્ર ચહલની પત્ની ધનશ્રી વર્માની છેલ્લી ચેટ છે કે શું તમે આપણા વીડિયોમાં પાછા આવી ગયા? આ સાથે જ રોહિત શર્માએ તો એકાઉન્ટ ડિલીટ કરવાનું પણ લખ્યું છે. યુઝવેન્દ્ર ચહલની ચેટનો સ્ક્રીનશોટ સોશિયલ મીડિયા પર વાયરલ થઈ રહ્યો છે.
રાજસ્થાન રોયલ્સનું એકાઉન્ટ પણ હેક થયું
આઈપીએલ 2022 દરમિયાન યુઝવેન્દ્ર ચહલે રાજસ્થાન રોયલ્સનું ટ્વિટર એકાઉન્ટ પણ હેક કર્યું હતું. યુઝવેન્દ્ર ચહલે ટ્વીટ કરીને પોતાને ટીમનો નવો કેપ્ટન બનાવ્યો હતો. ચાહકો પણ ચહલને અભિનંદન આપી રહ્યા હતા. ટીમના કેપ્ટન ગણાતા સંજુ સેમસને પણ ચહલને અભિનંદન પાઠવ્યા હતા, જે બાદ ખુલાસો થયો હતો કે આ જોક યુજવેન્દ્ર ચહલે કરી હતી. ચહલે ખુદ ટ્વિટર પર જાહેરાત કરી હતી કે, તે ટીમનું એકાઉન્ટ હેક કરવા જઈ રહ્યો છે.