વાંચનપ્રેમીઓ માટે રીડિંગ ક્લબ જામનગર દ્વારા મહિનાના ત્રીજા રવિવારે પુસ્તક પ્રદર્શન યોજાયું હતું. જેમાં વાંચનપ્રેમીઓએ ઉત્સાહભેર ભાગ લીધો હતો.
જામનગરમાં રીડિંગ ક્લબની અનોખી પહેલ
11મું પુસ્તક પ્રદર્શન યોજાયું
વાંચનનો શોખ ધરાવતા લોકો માટેનું ઉત્તમ ઠેકાણું
આજના આ જમાનામાં લોકોએ આધુનિકતાની પાછળ દોટ મુકી છે, ત્યારે હવે દરરોજ સવારે ઉઠીને ચાની ચુસ્કી સાથે અખબારો વાંચનારો વર્ગ ધીમે ધીમે ડિજિટલ અખબારની કોપી વાંચતો થયો છે, આમ ધીમે ધીમે એક પલાંઠીએ બેસીને પુસ્તકો વાંચવા ઘણો સમય માગી લેતું કામ છે, ત્યારે આ ઝડપી દોડતા યુગમાં પણ જામનગરના યુવાનોએ પુસ્તકો પ્રત્યે લોકોની રુચિ જળવાઈ રહે, અને આ યંત્રયુગમાં પણ પુસ્તકોનો મહિમા જળવાઈ રહે તે હેતુથી રીડિંગ ક્લબ દ્વારા વાંચવાનો શોખ હેમખેમ રહે અને લોકો પુસ્તકોથી વેગળા ન થાય તેના માટેના પ્રયાસો કરતા રહે છે.
લોકોમાં વાંચનનો શોખ જળવાઈ રહે અને લોકો પુસ્તકથી દૂર ન થાય તે હેતુથી પાંચ મિત્રોએ ભેગા થઈને એક નવી પહેલ શરુ કરી છે. આ પાંચ મિત્રોએ 6 હજાર રૂપિયાનો ખર્ચ કરીને પુસ્તકો વસાવીને 'રીડિંગ ક્લબ'ની શરુઆત નવેમ્બર 2019માં કરી હતી, ત્યારથી લોકોમાં વાંચનની ભૂખ વધારવા, શોખ કેળવવા તથા નવી પેઢીને મોબાઈલની જગ્યાએ પુસ્તકો તરફ વાળવા માટે આ ક્લબ કામ કરી રહી છે.
આ મહિનાના ત્રીજા રવિવારે રીડિંગ ક્લબ - જામનગર' દ્વારા જામનગરના વાંચનપ્રેમીઓ માટે ૧૧માં 'પુસ્તક પ્રદર્શન'નું આયોજન કરવામાં આવેલ હતું. જેની ઘણા પુસ્તક પ્રેમીઓએ મુલાકાત લીધેલી અને પ્રદર્શિત પુસ્તકોમાંથી પોતાની પસંદનું પુસ્તક વાંચવા માટે ઘરે પણ લઈ ગયા હતા.
આપને જણાવી દઈએ કે, આ ક્લબ પાસે હાલમાં 1100થી વધારે પુસ્તકોનુ કલેક્શન છે. આ પુસ્તકો વાંચનપ્રેમીઓ માટે માત્ર રજીસ્ટ્રેશન કરાવીને ફી આપ્યા વિના પણ આપ લઈ શકશો. જ્યાં આપને ગુજરાતી, હિન્દી અને અંગ્રેજીમાં નવલકથા, વાર્તાસંગ્રહો, કવિતાસંગ્રહો સહિત ધાર્મિક સિવાય અન્ય પુસ્તકો પણ અહીં વાંચવા માટે મળી રહે છે. આપને જણાવી દઈએ કે, અત્યાર સુધીમાં અહીં 120 જેટલા વાંચકોના રજીસ્ટ્રેશન થયા છે.