રાજ્યમાં અવારનવાર અકસ્માતની ઘટનાઓ સામે આવતી રહે છે. ત્યારે અમદાવાદમાં વધુ એક હિટ એન્ડ રનની ઘટના સામે આવી છે. જેમાં એક વ્યક્તિનું ઘટનાસ્થળે જ મોત નિપજ્યું છે.
અમદાવાદના વસ્ત્રાલમાં હિટ એન્ડ રનની ઘટના
પીકઅપ વાન ચાલકે રાહદારીને અડફેટે લેતા યુવકનું મોત
વસ્ત્રાલમાં બનેલી ઘટનાના CCTV ફૂટેજ સામે આવ્યા
રાજ્યમાં દરરોજ અકસ્માતનો એક બનાવ (Gujarat road accidents) તો સામે આવતો જ રહે છે. એવામાં અમદાવાદના વસ્ત્રાલમાં ગઇકાલે શુક્રવારના રોજ એક હિટ એન્ડ રનની ઘટના ઘટી હતી. ત્યારે વસ્ત્રાલમાં બનેલી આ ઘટનાના CCTV ફૂટેજ સામે આવ્યા છે. મહત્વનું છે કે, વસ્ત્રાલમાં એક પીકઅપ વાનચાલક રાહદારીને અડફેટે લઈને ફરાર થઇ ગયો હતો. જે ઘટનામાં શૈલેષ પ્રજાપતિ નામના યુવકનું મોત નિપજ્યું છે. જો કે, આ ઘટનાને લઈને પરિવાર તેમજ સ્થાનિક લોકોમાં ભારે રોષ જોવા મળી રહ્યો છે. હાલમાં સ્થાનિક લોકો તેમજ તે યુવકના પરિવારજનો તાત્કાલિક ધોરણે વાહનચાલકને પકડવાની માંગ કરી રહ્યાં છે.
તાજેતરમાં જ કલોલ ખાતે સર્જાયો હતો અકસ્માત
મહત્વનું છે કે, એક-બે દિવસ પહેલાં જ ગાંધીનગરના કલોલમાં બોરિસ ખાતે આવેલા બ્રિજ પર હીટ એન્ડ રનની ઘટના સામે આવી હતી. જેમાં એક વાહનચાલકે બાઇક સવાર યુવકને અડફેટે લેતા અકસ્માત સર્જાયો હતો. જેમાં યુવાન કાળનો કોળીયો બની જતા ગાંધીનગર પંથકમાં હાહાકાર મચી ગયો હતો.
ગાંધીનગરના ભાટ એપોલો સર્કલ નજીક વધુ એક અકસ્માત સર્જાયો હતો
આ ઉપરાંત અકસ્માત અંગેની વધુ એક ઘટના ગાંધીનગરના ભાટ એપોલો સર્કલ નજીક બની હતી. જેમાં ટોયોટા કારના ચાલકે અચાનક કાબૂ ગુમાવી દેતા કાર ડિવાઇડર સાથે અથડાયો હતો. જેને પગલે કાર પલટી મારી ગઈ હતી. આ અકસ્માતમાં કાર ચાલક યુવાનનું કમકમાટીભર્યું મોત નીપજ્યું હતું. જેથી અડાલજ પોલીસે અકસ્માતે મોતનો ગુનો નોંધી કાર્યવાહી હાથ ધરી હતી.
બનાસકાંઠામાં રિક્ષા અને બાઇકની ટક્કરમાં યુવાનનું ઘટનાસ્થળે જ મોત
આ અગાઉ એક દિવસ પહેલાં પણ ગત મોડી રાત્રે બનાસકાંઠા જિલ્લામાં થયેલા અકસ્માતમાં એક યુવાનનું મોત નિપજ્યું હતું. રિક્ષા અને બાઇક વચ્ચે ગંભીર આ અકસ્માત થયો હતો. રિક્ષા અને બાઇક વચ્ચેની ટક્કર એટલી જોરદાર હતી કે બાઇક ચાલકનું ઘટનાસ્થળે જ મોત થયું હતું. આ બનાવમાં રિક્ષા ચાલક અને અન્ય કેટલાંક પણ ઘાયલ થયા હતા. આ તમામને સારવાર માટે શિહોરી (Shihori) હોસ્પિટલ ખાતે ખસેડવામાં આવ્યા હતાં.