કોરોના વાયરસ / લૉકડાઉન વચ્ચે સુરતમાં સાંસદ C.R. પાટીલે 400 યુવાનોની ટીમ સાથે મળીને કર્યું સરાહનીય કામ

• સાંસદ સી.આર. પાટીલની ઓફિસમાં જ કંટ્રોલ રૂમ શરૂ કરાયો
• સાંસદને યુથ ફાઉન્ડેશનની ટિમ સહાયક તરીકે મળી
• હજારો લોકોને રાશન કીટ, રેલ ટીકીટ સહિતની સહાયતા

સાંસદ સી.આર. પાટીલની ઓફિસ કાયમ ધમધમતી હોય છે, મુલાકાતીઓની આવન-જાવન ચાલુ જ હોય છે. તેવામાં આ લૉકડાઉનમાં સ્વાભાવિક રીતે અહીંયા ચહલ પહલ વધી ગઈ છે. હજારો લોકોને રાશન કીટ, રેલ ટીકીટ સહિતની સહાયતા અહીંથી થઈ રહી છે. આ ભગીરથ કાર્યમાં સાંસદ સી.આર. પાટીલને યુથ ફાઉન્ડેશનની ટિમ સહાયક તરીકે મળી અને કામગીરીને ચાર ચાંદ લાગી ગયા હતા.

કાસ્ટ નહીં રાષ્ટ્રના સ્લોગન સાથે ચાલતી સંસ્થા યુથ ફાઉન્ડેશન અત્યારે તો કોવિડ વોરિયર્સ તરીકે કામ કરે છે. નાતજાતના કોઈપણ ભેદભાવ વગર સતત કામ કરતા આ યુવાનોએ સુરત શહેર જ નહીં, બારડોલી, કામરેજ, કોસંબા, પલસાણા કે નવસારી અને સમગ્ર સુરત શહેરમાં અડધી રાત્રે મદદ પહોંચતી કરી છે. એટલું જ નહીં આ તમામ કામગીરીના સંકલન માટે એક વૉર રૂમ એટલે કે કંટ્રોલ રૂમ શરૂ કર્યો છે. જેમાં દરરોજ 200થી વધુ ફોન રિસીવ કરી તમામને જે જરૂરિયાત હોય તે પુરી કરવાની સાથે સાથે તમામનો ડેટા પણ સાચવી રાખવામાં આવ્યો છે. આ એક ભગીરથ કાર્ય આજના સમાજ માટે પ્રેરણારૂપ છે.

ધવલ પટેલ અને તેમનું યુથ ફાઉન્ડેશન માત્ર અત્યારે જ નહીં છેલ્લા ઘણા સમયથી યુથ ફાઉન્ડેશનના માધ્યમથી સામાજિક કર્યો કરે છે. ખાસ કરીને સ્વચ્છતા બાબતે તેઓ ઘણી બધી કામગીરી કરી રહ્યા છે. જેની નોંધ ખુદ વડાપ્રધાન નરેન્દ્ર મોદીએ પણ લીધી છે.