સુરતમાં વર્ષોથી લિંક સિટી બસ સર્વિસને જ કોન્ટ્રાક્ટ આપવામાં આવે છે, કોઈ ઠોસ કાર્યવાહી ન થતાં અકસ્માતોની વણઝાર થઈ રહી હોવાના આરોપ લાગી રહ્યા છે.
સુરતમાં ફરી જીવલેણ બની સિટી બસ
બસની અડફેટે બાઈકચાલકનું ઘટનાસ્થળે મૃત્યુ
આદર્શ ટેક્સટાઈલ માર્કેટ પાસે બની દુર્ઘટના
સુરતમાં ઓવરસ્પીડમાં દોડતી સિટી બસોએ અકસ્માતની વણઝાર કરી છે. આજે વહેલી સવારે રિંગરોડ વિસ્તારમાં બેફામ આવતી બસે આશાસ્પદ યુવકને મોતની ટક્કર મારી હતી. અકસ્માત એટલો ભયાવહ હતો કે યુવકનું ઘટનાસ્થળે જ કમકમાટી ભર્યું મોત નીપજ્યું હતું. અકસ્માત કરી બસ ચાલક ત્યાંથી ફરાર થઈ ગયો હતો. લોકોના ટોળે ટોળાં ઉમટી પડતાં ટ્રાફિકજામના દ્રશ્યો સર્જાયા હતા.
ટિફિન લઈ કામે જઈ રહ્યો હતો..
સુરતમાં ટેક્સટાઇલ માર્કેટ નજીક બનેલા આ બનાવની વિગત જોઈએ તો એક નાની ઓરડીમાં રહેતા કિશન નામનો યુવક અને તેનો ભાઈ રોજીંદી ક્રિયા મુજબ ટિફિન લઈ કામ કરવા નીકળ્યા હતા. રસ્તામાં પુરપાટ ઝડપે આવેલી સીટી બસે યુવકને ફંગોળ્યા હતા, જેમાં કિશન મોતને ભેટ્યો હતો.
બાળક માતાની કૂખમાં જ અનાથ
હજુ તો થોડી ઘડી પહેલા હાથમાં ટિફિન લઈને કામ પર જવા નીકળેલો યુવકના મોતના સમાચાર સાંભળી પરિવારની પગ નીચેથી જમીન સરકી ગઈ હતી. કાળજું કંપાવે તેવી વાત એ છે કે મૃતક યુવકના હજુ 10 મહિના પહેલા જ લગ્ન થયા હતા અને તેમની પત્ની ગર્ભવતી છે 9મો મહિનો ચાલુ છે. વિધિની વક્રતાએ છે કે બાળક માતાની કૂખમાં જ અનાથ થઈ ગયું છે.
પરિવારના આક્રંદથી ગલીઓ ગુંજી
પરિવારનો એકનો એક કમાનાર, મોભી સમાન યુવકનું અવસાન થતાં પરિવાર સાવ ભાંગી પડ્યો છે. માતા-પિતા, ભાઈ-બહેન, તેમજ વિધવા પત્નીના આંખમાંથી આસું સુકાતા નથી. પતિના મોતના સમાચાર મળતા જ પત્ની બે ભાન થઈ ગઈ હતી. ગર્ભમાં રહેલા બાળકના જીવ પર આવી ગયું હતું. પરિવાર એક જ માંગ કરી રહ્યો છે કે બસ ડ્રાઈવરને કડકમાં કડક સજા કરવામાં આવે જેથી અન્ય કોઈ પરિવારને આ તકલીફ ન વેઠવી પડે.
સળગતા સવાલ?
બેફામ બસચાલક વિરુદ્ધ કોણ કરશે કાર્યવાહી?
સુરત સિટી બસના બેફામ ડ્રાઇવરો પર પગલાં ક્યારે લેવાશે?
નિર્દોષ બાઇકચાલકની મોત માટે કોણ જવાબદાર?
બેફામ ડ્રાઇવરોને કાબૂમાં કેમ નથી રાખતુ તંત્ર?
શું આ નિર્દોષ બાઇકચાલકના પરિવારને કાઇ વળતર મળશે?
કરુણતા એ છે કે બસ ચાલક એક યુવકને નહીં આખાય પરિવારની અનેક આશા અપેક્ષાને અડફેટ લઈ લીધી છે. એક ગર્ભવતી પત્નીએ પતિ ગુમાવ્યો છે, આવનાર બાળકે પિતા ગુમાવ્યો છે. મૃતક યુવકના માતા પિતાએ ઘડપણનો સહારો ગુમાવ્યો હતો. રક્ષાબંધન પહેલા એક બહેને પોતિકા ભાઈની અર્થી ઉઠતી જોઈ છે. ચાર ભાઈ-બહેનોમાં કિશન ડાયમંડ ફેક્ટરીમાં નોકરી કરી તમામનું પેટિયું રળતો હતો. હાથબળે પરિવારને સાચનાર આજે અકસ્માતે મોતને ભેટયા પરિવાર વેર વિખેર થઈ ગયો છે. નાની ઓરડી પહેલા ગીચોગીચ લાગતી હતી. હાલ ક્યારેક રો-કકડાટથી ગુંજી ઉઠે છે તો ક્યારે શાવ શાંત દેખાઈ રહી છે. પોલીસે ગુનો નોંધી બસ ડ્રાઈવરને પકડવા તપાસ હાથ ધરી છે.