ભંગાણ / એક સાંધે ત્યાં તેર તૂટે: ચૂંટણી પૂર્વે કોંગ્રેસને વધુ એક ઝટકો, આવતી કાલે યુથ કોંગ્રેસ અને NSUIના નેતાઓ કરશે કેસરિયા

• હવે યુથ કોંગ્રેસ અને NSUIના નેતાઓ જોડાશે ભાજપમાં
• ખૂબ મોટી સંખ્યામાં કાર્યકર્તાઓ સાથે ભાજપમાં જોડાશે
• આવતીકાલે CR પાટીલની હાજરીમાં કેસરિયા કરશે

ગુજરાત વિધાનસભાની ચૂંટણી હવે ગણતરીના જ મહિના બાકી છે. એ પહેલા તો કોંગ્રેસને એકબાદ એક ઝટકા લાગી રહ્યાં છે. હજુ તો ગઇકાલે જ કોંગ્રેસના દિગ્ગજ નેતા વિશ્વનાથસિંહ વાઘેલાએ કોંગ્રેસમાંથી રાજીનામું આપ્યું છે ત્યાં તો હવે યુથ કોંગ્રેસ અને NSUIના નેતાઓ ભાજપમાં જોડાશે.

આવતી કાલે CR પાટીલની હાજરીમાં કેસરિયા કરશે

વિધાનસભા ચૂંટણી પહેલા અને રાહુલ ગાંધીના અમદાવાદ આગમન સમયે જ કોંગ્રેસને વધુ એક ફટકો પડ્યો છે. યુથ કોંગ્રેસ અને NSUIના નેતાઓ હવે ભાજપમાં જોડાશે. યુથ કોંગ્રેસ પ્રદેશ મહામંત્રી જીગર માળી ભાજપમાં જોડાશે. તો NSUI પ્રદેશ ઉપ પ્રમુખ પાર્થ દેસાઈ ભાજપમાં જોડાશે. એ સિવાય વિશાલ ઠાકોર અને માલારામ ભાવરી પણ ભાજપમાં જોડાશે. એટલે કે આવતીકાલે ખૂબ મોટી સંખ્યામાં કાર્યકર્તાઓ સાથે આ તમામ ભાજપમાં જોડાશે. આવતી કાલે CR પાટીલની હાજરીમાં યુથ કોંગ્રેસ અને NSUIના નેતાઓ કેસરિયા કરશે.

ગઇકાલે જ ભરૂચ કોંગ્રેસમાં પણ ભંગાણ પડ્યું હતું

ઉલ્લેખનીય છે કે, ગુજરાત વિધાનસભા ચૂંટણી પહેલા ગઇકાલે ભરૂચ કોંગ્રેસમાં પણ ભંગાણ પડ્યું હતું. શહેર કોંગ્રેસના પ્રમુખ વિકી શોખી સહિત 400 જેટલા આગેવાન વિધિવત રીતે ભાજપમાં જોડાયા હતા. કોંગ્રેસ નેતાથી નારાજ થઈ ભરૂચ શહેર કોંગ્રેસ પ્રમુખ વિક્કી શોખી, પ્રદેશ કોંગ્રેસ યુવા હોદ્દેદાર નિકુલ મિસ્ત્રી, વાગરા અને શહેર તેમજ તાલુકાના 7 હોદેદારોએ રાજીનામાં આપ્યા હતા. ભરૂચ ડિસ્ટ્રીકટ સહકારી બેંક ખાતે જિલ્લા ભાજપ પ્રમુખ મારૂતિસિંહ અટોદરિયા સહિતના આગેવાનની ઉપસ્થિતિમાં કોંગ્રેસના 400 જેટલા હોદેદારો અને કાર્યકરો સાથે આમ આદમી પાર્ટીના 2 હોદેદારોને ભાજપમાં આવકાર આપી કેસરિયો ખેસ પહેરાવાયો હતો.

વિશ્વનાથ વાઘેલાએ ગુજરાત યુથ કોંગ્રેસના પ્રમુખ પદેથી રાજીનામું આપી દીધું

એ સિવાય વિશ્વનાથ વાઘેલાએ ગઇકાલે ગુજરાત યુથ કોંગ્રેસના પ્રમુખ પદેથી રાજીનામું આપ્યું હતું. રાહુલ ગાંધીના ગુજરાત પ્રવાસ પહેલા જ તેઓએ રાજીનામું આપતા કોંગ્રેસને મોટો ઝટકો લાગ્યો હતો. મહત્વનું છે કે, છેલ્લા ઘણાં સમયથી ઈન્દ્રવિજયસિંહ ગોહિલ અને વિશ્વનાથ વાઘેલા વચ્ચે વિવાદ ચાલતો હતો. વિશ્વનાથ વાઘેલાએ રાજીનામું આપ્યા બાદ કહ્યું હતું કે, 'કોંગ્રેસમાં માત્ર નહેરૂ-ગાંધી પરિવારની જ ભક્તિ થાય છે. પ્રદેશ પ્રમુખ બન્યા બાદ હું આંતરિક જૂથવાદનો ભોગ બન્યો. કોંગ્રેસ પક્ષ એકપણ રીતે યોગ્ય નથી લાગતો. યુવાનો કોંગ્રેસમાં સમય વેડફી રહ્યાં છે. આંતરિક જૂથવાદથી પક્ષમાં દુશ્મનો ઉભા થાય છે. દેશની સત્તા માટે જનતાએ કોંગ્રેસને ખૂબ તકો આપી. કોંગ્રેસ પોતાના જ કાર્યકરોને શંકાની નજરે જુએ છે.'