શહેરના ઇસનપુર વિસ્તારમાં ગઇ કાલે પેટ્રોલિંગ દરમિયાન હેડ કોન્સ્ટેબલ પર માથાભારે યુવકે છરી વડે હુમલો ઘાતકી કરતાં સમગ્ર વિસ્તારમાં ચકચાર મચી ગઇ છે. ઇસનપુર પોલીસ સ્ટેશનમાં પીઆઈ પર્સનલ ઓફિસમાં હેડ કોન્સ્ટેબલ તરીકે ફરજ બજાવતા યુવરાજસિંહ ભીખુભાએ ઝુબેર ઉર્ફે ચોંટી અયાઝખાન પઠાણ વિરુદ્ધમાં ઇસનપુર પોલીસ સ્ટેશનમાં હત્યાની કોશિશની ફરિયાદ નોંધાવી છે.
ફરિયાદમાં કરાયેલા આક્ષેપ પ્રમાણે ગઈ કાલે રાતના નવ વાગ્યાની આસપાસ ઇસનપુર પોલીસ અને તેમના સ્ટાફના માણસો પેટ્રોલિંગમાં ફરતા હતા ત્યારે પોલીસ સ્ટેશનથી થોડા અંતરે ચાલતાં ચાલતાં હેડ કોન્સ્ટેબલ યુવરાજસિંહ અને તેમની ટીમ જઇ રહ્યાં હતાં.
તે દરમિયાન પેટ્રોલિંગમાં ફરતાં ફરતાં હેડ કોન્સ્ટેબલ રાતના ૯.૩૦ વાગ્યાની આસપાસ મિલ્લતનગર મુનશીનગરની સામે કટલરીની દુકાન પાસે પહોંચતાં ઇસનપુર પોલીસ સ્ટેશનમાં અગાઉ ગુનામાં પકડાયેલ અને ગુનાઇત કૃત્ય ધરાવતો યુવક ઝુબેર ઉર્ફે અયાઝખાન પઠાણ ઊભો હતો. ઝુબેર કાયમ તેની પાસે છરી રાખતો હોવાથી પોલીસને તેના પર શંકા ગઈ હતી.
જેથી હેડ કોન્સ્ટેબલે તેની પાસે જઈને ઝુબેરને રોકી ચેક કરી તેની પૂછપરછ કરતાં તે એકદમ ઉશ્કેરાઈ ગયો હતો અને હેડ કોન્સ્ટેબલને કહેવા લાગ્યો કે તું મને કેમ પૂછે છે અને પોલીસ હોય તો શું થઇ ગયું, તું ગમે ત્યારે ચેક ન કરી શકે તેમ કહીને ઝુબેરે તેમની પાસે રહેલી છરી કાઢી હેડ કોન્સ્ટેબલ પર હુલાવી દીધી હતી.
ત્યારબાદ ઝુબેરે હેડ કોન્સ્ટેબલને છરીના ઘા મારતાં મારતાં કહ્યું કે ઇસ પોલીસ વાલે કો આજ પૂરા કર દૂંગા. આમ કહીને તેણે હેડ કોન્સ્ટેબલના ગળા તેમજ શરીર પર છરી હુલાવતાં તે જમીન પર પડી ગયાે હતાે અને ત્યારબાદ હેડ કોન્સ્ટેબલના શરીર પર આડેધડ છરી વડે હુમલો કરતાં તે પણ જમીન પર ઢળી પડ્યા હતા. હેડ કોન્સ્ટેબલ લોહીથી લથપથ હાલતમાં જમીન પર તરફિડયાં મારતા હતા તે દરમિયાન સ્ટાફના માણસો ભેગા થઇ ગયા હતા.
ઝુબેર હુમલો કર્યા બાદ ત્યાંથી નાસી ગયાે હતાે જ્યારે હેડ કોન્સ્ટેબલને ૧૦૮ ઇમર્જન્સી એમ્બ્યુલન્સ મારફતે સારવાર અર્થે એલજી હોસ્પિટલમાં ખસેડવામાં આવ્યા હતા. ઇસનપુર પોલીસે ઝુબેર વિરુદ્ધમાં હત્યાની કોશિશનો ગુનો દાખલ કરીને તપાસ શરૂ કરી છે.
ઉલ્લેખનીય છે કે શહેરમાં દિવસે દિવસે મારામારી, હત્યા જેવી ઘટનાઓ વધી રહી છે. થોડા દિવસ અગાઉ આ જ વિસ્તારમાં ઇસનપુરના િમલ્લતનગરમાં એક યુવકની ચપ્પાના ઘા ઝીકીંને કરપીણ હત્યા થતાં સમગ્ર શહેરમાં ચકચાર મચી ગઇ છે. મિલ્લતનગરમાં રહેતા બે ભાઇઓએ યુવકની તેની માતાની નજર સામે જ ઘાતકી હત્યા કરી છે, જેમાં પોલીસે એક આરોપીની અટકાયત પણ કરી છે.