વાડજ વિસ્તારમાં રહેતી વિધવા મહિલાને સહાય અપાવવાના બહાને અજાણી મહિલા સિવિલ હોસ્પિટલ લઇ જઈને ૬૦ હજારના દાગીના તફડાવીને ફરાર થઇ ગઈ હતી. વાડજ વિસ્તારમાં આવેલ કાશ્મીરા મહાદેવની ચાલીમાં રહેતાં ૫૦ વર્ષીય જશીબહેન પટેલે અજાણી મહિલા વિરુદ્ધમાં વાડજ પોલીસ સ્ટેશનમાં ફરિયાદ નોંધાવી છે.
ફરિયાદમાં જણાવ્યા મુજબ જશીબહેન જૂના વાડજના દશામાના મંદિર પાસે વિનય કિરાણા સ્ટોર નામની દુકાન ધરાવે છે. તેમને ત્રણ સંતાન છે, તેમાંથી તેમનો મોટો ૩૦ વર્ષીય દીકરો વિનય બન્ને પગે અપંગ છે અને તેને જમણી આંખે ઓછું દેખાય છે.
ગઈ કાલે બપોરના સમયે જશીબહેન તેમની દુકાને હાજર હતાં ત્યારે એક અજાણી મહિલા અને તેની સાથે એક નાની બાળકી દુકાન પર આવ્યાં હતાં અને લીલાબહેનેના ઘરનું સરનામું પૂછવા લાગ્યાં હતાં. દુકાન પર જશીબહેનના દીકરા વિનયને જોઈ તે કહેવા લાગી કે આ તમારો દીકરો છે, જે મંદબુદ્ધિ છે તો તેના માટે અત્યારે સરકાર સહાય કરે છે અને તમે પણ વિધવા છો તો તમને પણ મદદ મળશે.
તેના માટે તમારે તથા તમારા દીકરાએ સિવિલ હોસ્પિટલ આવવું પડશે તેમજ તમારા બધા ડોક્યુમેન્ટ લઇ લો, જેથી જશીબહેનને અજાણી મહિલા પર વિશ્વાસ આવી જતાંં જશીબહેન, તેમનો દીકરો અને અજાણી મહિલા ભાડે રિક્ષા કરીને સિવિલ હોસ્પિટલ ગયાં હતાં, જ્યાં જશીબહેનને અજાણી મહિલા અલગ અલગ વોર્ડમાં લઇ ગઈ હતી. બાદમાં તેમને એક રૂમની બહાર બેસવા કહ્યું હતું.
થોડીવાર પછી મહિલા એક ફોર્મ લઈને આવી હતી અને જશીબહેનને કહ્યું કે તમારા ફોટા પાડવાના છે એટલે તમે હાથમાં પહેરેલ બંગડી અને ચેઇન મને આપી દો, નહીં તો સરકારી સહાય નહીં મળે તેવી વાત કરતાં જશીબહેને દાગીના કાઢીને અજાણી મહિલાને આપી દીધા હતા.
ત્યારબાદ મહિલા ઝેરોક્ષ કઢાવી આવું છું તેમ કહીને જશીબહેનનાં સોનાની બંગડી અને ચેઇન, જેની કિંમત રૂ. ૬૦ હજાર છે તે લઈને ફરાર થઇ ગઈ હતી. જશીબહેને અજાણી મહિલા પાછી ન આવતાં હોસ્પિટલમાં શોધખોળ કરી હતી. જશીબહેને વાડજ પોલીસ સ્ટેશનમાં ફરિયાદ નોંધાવી હતી. પોલીસે હાલ ગુનો નોંધી મહિલાની શોધખોળ શરૂ કરી છે.