અમદાવાદમાં દાંડીયાત્રા દરમિયાન વિપક્ષના નેતા પરેશ ધાનાણીની અટકાયત કરવા આવેલા પોલીસ કર્મીઓને કહ્યું કે, આ પ્રકારે કામ કરતા રહેશો તો તમારા છોકરા ગુલામ પેદા થશે.
પોલીસ અને ધાનાણી વચ્ચે બબાલ
અટકાયત કરવા જતા બોલાચાલી
દાંડીયાત્રા દરમિયાન અટકાયતનો મામલો
કોંગ્રેસની દાંડી યાત્રા દરમિયાન પોલીસ અને વિપક્ષના નેતા પરેશ ધાનાણી વચ્ચે બોલાચાલી થઈ હતી. પરેશ ધાનાણીની અટકાયત કરવા જતા પરેશ ધાનાણી પોલીસ પર રોષે ભરાયા હતા અને તેમણે પોલીસને ચીમકી આપી દીધી કે લેખીતમાં ઓર્ડર બતાવો અને ઓર્ડર હોય તો જ મને હાથ લગાડો. ધાનાણીને જે પોલીસકર્મીઓ અટકાયત કરવા આવ્યા તેમની પાસેથી ધાનાણીએ ઓર્ડર માગ્યો હતો. સાથે કહ્યું કે, આ પ્રકારે કામ કરતા રહેશો તો તમારા છોકરા ગુલામ પેદા થશે.
મહત્વનું છે કે, અમદાવાદમાં મંજૂરી વિના દાંડીકૂચ કરતા કોંગ્રેસ કાર્યકરોની અટકાયત કરવામાં આવી હતી. પોલીસે કોંગ્રેસના પ્રદેશ પ્રમુખ અમિત ચાવડા, પ્રવક્તા મનિષ દોશી સહિત તમામ મોટા નેતાઓની અટકાયત કરીને પોલીસ વેનમાં બેસાડી દીધા હતા. પરેશ ધાનાણીની પણ અટકાયત કરી દેવાઈ છે. આ સાથે પોલીસ અને મહિલા કાર્યકરો વચ્ચે ઘર્ષણ પણ સર્જાયું હતું. કોંગ્રેસની કૂચને અટકાવવા પોલીસનો મોટો કાફલો ઉતારી દેવાયો છે.
પોલીસ અટકાયત બાદ પ્રદેશ પ્રમુખ અમિત ચાવડાનું નિવેદન
પોલીસ અટકાયત બાદ પ્રદેશ પ્રમુખ અમિત ચાવડાએ કહ્યું કે, પોલીસ અત્યાચાર કરી રહી છે. શું ગુજરાતમાં ગાંધીપથ પર ચાલવાનો અધિકાર નથી. સાથે અમિત ચાવડાએ કહ્યું કે, સરકાર પોલીસનો આશરો લઇ રહી છે. લોકશાહી બચાવવા કોંગ્રેસ લડતી રહેશે. દેશ અંગ્રેજો સામે ઝૂક્યો ન હતો તો સત્તા સામે પણ ઝૂકશુ્ં નહીં.
કોંગ્રેસના મહિલા કાર્યકરો અને મહિલા પોલીસ વચ્ચે ઘર્ષણ
કોંગ્રેસની દાંડીકૂચને રોકવા માટે પોલીસના કાફલા ઉતારી દેવાયા હતા. તો સાથે મહિલા પોલીસનો પણ મોટો સ્ટાફ કોંગ્રેસ ભવન પહોંચી ગયો હતો. જ્યાં મહિલા કોંગ્રેસના સંગઠન દ્વારા પણ આ દાંડી કૂચ કરવામાં આવી રહી હતી. ત્યારે મહિલા કોંગ્રેસના નેતા પ્રગતિ આહીર અને મહિલા પોલીસ વચ્ચે ઘર્ષણ સર્જાયું હતું.