કોરોના મહામારીમાં પણ સુરતના મોટા વરાછા વિસ્તારમાં મોટી સંખ્યામાં યુવાનો ક્રિકેટ મેચ રમવા માટે એકઠા થયા હતા, પોલીસ વાન આવતા બાઈક લઈ યુવાનોએ ચાલતી પકડી હતી
સુરતમાં કોરોના વચ્ચે ક્રિકેટ રમવા યુવાનો એકઠા થયા
ક્રિકેટના ગ્રાઉન્ડમાં મોટી સંખ્યામાં ભેગા થયા યુવાનો
મોટા વરાછા વિસ્તારના ગ્રાઉન્ડના દ્રશ્યો
સુરતમાં કોરોના વચ્ચે ક્રિકેટ રમવા યુવાનો એકઠા થયા હતા. ક્રિકેટના ગ્રાઉન્ડમાં મોટી સંખ્યામાં યુવાનો ભેગા થયા હતા. પોલીસને જાણ થતા પેટ્રોલિંગ વાન મોટા વરાછા વિસ્તારના ગ્રાઉન્ડ ખાતે પહોંચી હતી. પોલીસ પહોંચતા યુવાનોમાં ભાગદોડ મચી હતી. જેનો વીડિયો પણ સોશિયલ મીડિયામાં વાઈરલ થયો હતો. ક્રિકેટ રસિયાઓની ભાગદોડનો વીડિયો સામે આવ્યો હતો.
કોરોનાકાળમાં અમદાવાદ સહિત સુરતમાં પણ લોકો સંક્રમણનો ભોગ બની રહ્યા છે. આવા સમયમાં પોલીસ અને મેડિકલ સ્ટાફ રાત દિવસ દર્દીઓની સેવામાં કાર્યરત છે. ત્યારે આ સંક્રમણમાં સહયોગની સૌથી વધુ આશા યુવાનો પાસેથી છે. પરંતુ જો યુવાનો મદદ કરવાના બદલે બેદરકારી જેવું વર્તન કરશે. તો તેની સામે કાયદાકીય કાર્યવાહી કરવામાં તંત્રએ જરા પણ શરમ રાખવી જોઈએ નહીં.
શું છે સુરતમાં કોરોનાની સ્થિતિ
કોરોનાના વધતા સંક્રમણ વચ્ચે દેશભરમાં મેડિકલ ઓક્સિજનની માગ વધી ગઈ હતી. અને અવ્યવસ્થાના ઘણા કિસ્સાઓ સામે આવ્યા છે. પરંતુ સુરતમાં હાલમાં મેડિકલ ઓક્સિજનની અછત દૂર થઈ ગઈ હોવાનો દાવો થયો છે. સુરત મહાનગરપાલિકાના અધિકારીઓએ વીટીવી સાથે વાત કરતા જણાવ્યું કે, સુરતમાં 149 મેટ્રીક ટનના વપરાશ સામે સુરતને 169 મેટ્રીક ટન ઓક્સિજન મળે છે. કેટલાક સમયે સુરતમાં કોરોનાના કેસમાં ચિંતાજનક વધારો થયો હતો. અને એ સમયે સુરતમાં 241 મેટ્રીક ટન ઓક્સિજનની જરૂરિયાત રહેતી હતી.
પરંતુ હાલમાં કોરોનાના કેસમાં ઘટાડો થવાની સાથોસાથ સુઘડ આયોજનના કારણે ઓક્સિજન મામલે ચિંતા નથી રહી. અધિકારીઓએ જણાવ્યું અનુસાર રિફિલ માટે જતી ઓક્સિજન ટેન્કરને અને અન્ય વાહનોને ટ્રેક કરવામાં આવી રહ્યા છે. જેથી કાળા બજારીની સંભાવના નથી રહેતી. સાથે જ વોર રૂમ મારફતે સુરતની અલગ અલગ હોસ્પિટલ સાથે મનપા સતત સંપર્કમાં રહે છે. આટલું જ નહીં, કોરોનાની ત્રીજી લહેરની સંભાવનાને જોતા હોસ્પિટલને ઓક્સિજન પ્લાન્ટ નાખવા મામલે પણ પ્રેરિત કરવામાં આવી છે.