સેવા / કોરોના સંકટમાં ગુજરાતનો દરેક યુવાન આવું કામ કરે તો કોઈ વ્યક્તિ રાતે ભૂખ્યો નહીં સૂવે

• કોરોનાના કહેર વચ્ચે અમદાવાદના યુવાનોનું અનોખું અભિયાન 
• ઘરે-ઘરેથી ઉઘરાવે છે માત્ર 2 રોટલી 
• દરરોજ સાંજે ભૂખ્યા લોકોને જમાડે છે 

ઉલ્લેખનીય છે કે, સમગ્ર વિશ્વમાં હાહાકાર મચાવનાર કોરોના વાયરસને કારણે ભારતમાં 35થી વધુ લોકોના મોત થયાં છે અને ગુજરાતની વાત કરીએ અમદાવાદ કોરોનાનું હોટસ્પોટ બન્યું છે. ત્યારે રસ્તે રખડતા લોકો માટે 2 ટંકનું ભોજન એક પ્રશ્ન બનતા આવા લોકોની મદદ માટે અમદાવાદના યુવાનોએ અનોખું અભિયાન હાથ ધર્યું છે. 

'દો' રોટી દેશ કે નામથી ખાસ અભિયાન

અમદાવાદના જમાલપુર વિસ્તારના યુવાનોએ 'દો' રોટી દેશ કે નામથી અભિયાન હાથ ધર્યું છે. આ યુવાનો દરરોજ પોતાના વિસ્તારમાં ઘરે-ઘરે ફરીને માત્ર 2 રોટલી માગે છે અને સાંજે ભેગી કરેલી રોટલીમાંથી કેટલાય લોકોને જમાડવામાં આવે છે. યુવાનોને આ પ્રયાસથી પ્રેરાઇને સ્થાનિકો હવે તેમને ગોળ, ડુંગળી જેવી વસ્તુઓ પણ આપી રહ્યા છે. આ તમામ વસ્તુઓ ભેગી કરીને જમાલપુરના યુવાનો જરૂરીયાતમંદ વ્યક્તિઓ સુધી પહોંચાડે છે અને તેમને ભાવ પૂર્વક જમાડે છે. 

પોકેટ મનીમાંથી લોકોને જમાડવાની કરી હતી શરૂઆત 

આ અભિયાન માટે ફરહાન ખાન કહે છે કે, પહેલા અમે લોકો અમારી પોકેટ મનીમાંથી ભેગા કરેલા રૂપિયામાંથી ગરીબોને જમાડતા હતા પરંતુ ધીમે ધીમે લોકોની સંખ્યા વધતી ગઈ અને અમારા પૈસા ઓછા પડવા લાગ્યા તેમ છતાં અમે ગરીબોનું અને ભૂખ્યા માટે કઈ કરવા માંગતા હતા માટે આ રીતે જમાલપુર વિસ્તારના લોકોની મદદ લઇને હવે ભૂખ્યા લોકોને એક ટંકનો રોટલો પૂરો પાડીએ છીએ. 

સોશિયલ ડિસ્ટનસિંગનું રાખે છે ધ્યાન

ફરહાન ખાન સાથે આ અભિયાનમાં 10થી વધુ યુવાનો વોલેન્ટિયર તરીકે કામ કરે છે. જે લોકો સોશિયલ ડિસ્ટનસિંગ રાખીને માસ્ક પહેરીને ઘરે-ઘરે ફરે છે અને 2 રોટલી એકઠી કર્યા બાદ સાંજે ભૂખ્યા લોકોને જમાડે છે.