ક્રાઇમ / સુરતમાં 'રાજા'ને 6 લોકોએ મળીને ચપ્પાના ઘા મારી પતાવી દીધો, તપાસમાં હત્યાનું કારણ આવ્યું સામે

• સુરતમાં દિવસને દિવસે વધી રહ્યા છે હત્યાના બનાવો
• એક આરોપીની 6 વ્યક્તિઓ સાથે મળી ઘાતકી હત્યા કરી
• પોલીસે તમામ આરોપીઓની ધરપકડ કરી

સુરતના કતારગામ ફુલપાડા વિસ્તારમાં ગતરોજ રાત્રે કર્ફ્યુ દરમિયાન યુવકની ચપ્પુના અનેક ઘા મારી નિર્દય હત્યા કરવામાં આવતા ચકચાર મચી જવા પામી હતી. આ બનાવની જાણ થતાં પોલીસ કાફલો ઘટના સ્થળે દોડી આવ્યો હતો અને તપાસ શરૂ કરી હતી. હત્યા કરાયેલ યુવકનું નામ સંદીપ ઉર્ફે રાજા હોવાનું સામે આવ્યું છે. જે મૂળ ઓડિસાનો રહેવાસી છે. સુરતના કતારગામ વિસ્તારમાં ગીતાનગરમાં ઘર નજીક પાનનો ગલ્લો ચલાવી પરિવારનું ગુજરાન ચલાવતો હતો. યુવક દારૂ અને ગાંજાના વ્યવસાય સાથે સંકળાયેલો હતો અને જૂની અદાવત સાથે હપ્તા ખોરીના વિરોધમાં તેની હત્યા કરાઇ હોવાનું પોલીસને જાણકારી મળી હતી.

જોકે આ મારનાર શખ્સ છેલ્લા કેટલાક સમયથી આ વિસ્તારમાં રહેતા આરોપી મરનારના ઘરે જઈને ગાળાગાળી પણ કરતા હતા. જેને લઈને ગતરોજ આરોપી દ્વારા આ યુવકની કરપીણ હત્યા કરવામાં આવી હોવાનું પોલીસને પ્રાથમિક તપાસમાં બહાર આવ્યું છે.

પોલીસે આ ગુનામાં એક જ પરિવારના 4 સાથે મળીને 6 લોકોની ધરપકડ કરી છે. આ આરોપી પૂછપરછમાં હુમલો કરનાર માથાભારે અને ગેરપ્રવૃત્તિ સાથે સંકળાયેલા છે. 15 દિવસ પહેલા પણ મરનાર યુવાનના આખા પરિવારને મારી નાખવાની ધમકી આપી હતી. જેને લઈ પોલીસ સ્ટેશનમાં અરજી કરી હતી. રવિવારે સવારે પોલીસ સ્ટેશનમાં જવાબ લખાવીને આવ્યા બાદ રાત્રે યુવાનની નિર્મમ હત્યા કરાઈ છે. આ પરિવારનો એક યુવાન અગાઉ બંદૂક સાથે પકડાયો હતો. આવા અનેક ગુનાઓ આ પરિવાર વિરુદ્ધ કતારગામમાં નોંધાયા છે. હપ્તાખોરીનો વિરોધ અને જૂની અદાવત કારણભૂત હોવાનું પોલીસ તપાસમાં બહાર આવતા પોલીસે આ મામલે 6 લોકોની ધરપકડ કરી તેમના વિરુદ્ધ કાયદેસર કાર્યવાહી હાથ ધરી છે.