ચેતજો / વાલીઓ માટે લાલબત્તી સમાન કિસ્સો, PUBGમાં મશગુલ રહેતા તરૂણે કરી આત્મહત્યા

• તમામ માતા-પિતા માટે ચેતવણીરૂપ કિસ્સો
• PUBG રમવા મશગુલ રહેતા તરૂણે કરી આત્મહત્યા
• PUBGના કારણે તરૂણે પગલું ભર્યું હોવાની પરિવારને આશંકા

રાજકોટમાંથી માતા-પિતાને ચેતવણી આપતો એક ચોંકાવનારો કિસ્સો ફરીવાર સામે આવ્યો છે. રાજકોટમાં PUBG ગેમ રમવા માટે મશગુલ રહેતા એક તરૂણે આત્મહત્યા કરી લીધી હોવાનું સામે આવ્યું છે. દ્વારકેશ પાર્કમાં રહેતા તરૂણે આત્મહત્યા કરી લીધી છે. જો કે, આત્મહત્યા કરવા પાછળનું કારણ હજુ સુધી અકબંધ છે. જેને લઇને પોલીસે આત્મહત્યાનું કારણ જાણવા તપાસ હાથ ધરી છે. તરૂણના પરિવારજનોએ PUBG ગેમને લઇને આત્મહત્યા કરી હોવાની આશંકા વ્યક્ત કરી રહ્યાં છે.

યુવકે નહાવા જવાનું કહીને બાથરૂમમાં ફાંસો ખાઇ લીધો

વધુમાં જણાવી દઇએ કે, શહેરના રૈયારોડ પર આવેલી દ્વારકેશ સોસાયટીમાં રહેતા આનંદ અગ્રાવત નામના 18 વર્ષના એક યુવકે રવિવારે બપોરે નહાવા જતો હોવાનું કહીને બાથરૂમમાં નવેરાની ખીલાસરી સાથે દુપટ્ટો બાંધીને ફાંસો ખાઇ આત્મહત્યા કરી લીધી. બાદમાં લાંબો સમય વીત્યો હોવા છતાં તે બહાર નહીં આવતા બારણું તોડવામાં આવતા આનંદ લટકતી હાલતમાં મળી આવ્યો પરંતુ તેને ફટાફટ નીચે ઉતારી હોસ્પિટલમાં ખસેડવામાં આવ્યો, પરંતુ તેનું મોત નિપજ્યું હતું. બાદમાં યુવકના આપઘાતની ઘટનાની જાણ થતાં યુનિ.પોલીસનો સ્ટાફ ઘટનાસ્થળે દોડી આવ્યો.

આનંદને PUBG રમવાની ટેવ હતી

પોલીસ સૂત્રોના જણાવ્યાં અનુસાર, આનંદ બે ભાઇ અને એક બહેનમાં વચેટ હતો અને કપડાંના શો-રૂમમાં તે નોકરી કરતો હતો. તેના પરિવારજનોએ પોલીસ સમક્ષ કહ્યું હતું કે, આનંદને આપઘાત કરવો પડે તેવું કોઇ પણ કારણ ન હોતું પરંતુ તેને PUBG રમવાની ટેવ હતી અને તે સતત PUBG રમતો હતો. આથી આ કારણોસર કદાચ આવું પગલું ભર્યું હોય તેવી પોલીસે આશંકા વ્યક્ત કરી છે.

સુરતમાં પણ એક વિદ્યાર્થીએ આત્મહત્યા કરી લીધી

બીજી બાજુ સુરતમાં એક વિદ્યાર્થીએ કાકાએ ઠપકો આપતા વિદ્યાર્થીએ આપઘાત કર્યો છે. કાકાએ ઠપકો આપતા ધોરણ 10ના વિદ્યાર્થીએ આત્મહત્યા કરી લીધી. મળતી માહિતી મુજબ, મૃતક વિદ્યાર્થી કાકીને ફોન કરતો હતો જેને લઇને કાકાએ તેને ઠપકો આપ્યો હતો. આ ઠપકાને લઇને વિદ્યાર્થીએ ઘરના રસોડામાં દુપટ્ટો બાંધીને આત્મહત્યા કરી લીધી. જો કે, આ મૃતક વિદ્યાર્થી પાસેથી સ્યુસાઈડ નોટ પણ મળી આવી છે. જેમાં કાકાએ ખોટી શંકા કરી હોવાનો વિદ્યાર્થી દ્વારા ઉલ્લેખ કરવામાં આવ્યો છે. જેથી કાપોદ્રા પોલીસે ફરિયાદ નોંધીને આ મામલે આગળની કાર્યવાહી હાથ ધરી છે.