દર્દી યુવતીની સારવાર કરવા ઘરે જતા ડોક્ટરને બંધાયો સંબંધ અને....

જામનગર: ખંભાળિયામાં ખાનગી હોસ્પિટલ ધરાવતા તબીબ 4 વર્ષથી હની ટ્રેપમાં ફસાયા હતા. તેમને વારંવાર તબીબ ક્ષેત્રે બદનામ કરવાની ધમકીઓ મળવા લાગી હતી અંતે આ તબીબે કંટાળીને એક મહિલા સહિત 4 શખ્સો વિરુદ્ધ ખંભાળિયા પોલીસ મથકે ફરિયાદ નોંધાવી હતી.

આ અંગે પ્રાપ્ત થતી વિગતોનુસાર સરકારી દવાખાનામાં ફરજ બજાવી ચુકેલા અને હાલ ખાનગી હોસ્પિટલ ધરાવતા એક ડોક્ટર હનીટ્રેપમાં ફસાયા હતા. 4 વર્ષ પહેલા સરકારી હોસ્પિટલમાં જ્યારે તેઓ ફરજ બજાવતા હતા ત્યારે તેમની પાસે એક યુવતી સારવાર માટે આવી હતી. ત્યારથી બંને વચ્ચે મિત્રતા બંધાઈ હતી જો કે સમય જતાં તબીબ અવાર-નવાર આ યુવતીને સારવાર આપવા માટે ઘરે પણ જતાં હતા. 

સબંધો વધુ ગાઢ બનતા યુવતીએ આ વાતનો ફાયદો ઉઠાવી પૂર્વ આયોજિત કાવતરું રચ્યું. ત્યારબાદ શહેરના કેટલાક શખ્સોની મદદ લઇ તબીબને બળાત્કાર તેમજ જુદી-જુદી રીતે તબીબી ક્ષેત્રે બદનામ કરી દેવાની અવાર -નવાર ધાકધમકી આપી હતી. આ યુવતી અને તેના સાથીદારોએ કટકે-કટકે તબીબ પાસેથી રૂ.19.48 લાખ ખેરવી લીધા.

જો કે વારંવાર માનસિક અને આર્થિક ત્રાસ આપતા અંતે તબીબે કંટાળીને ચારેય શખ્સો વિરુધ્ધ ખંભાળિયા પોલીસ મથકમાં ફરિયાદ નોંધવી. આ ઘટનાને પગલે તબીબી આલમમાં ચકચાર મચી જવા પામેલ. હાલ ખંભાળિયા પોલીસ દ્વારા ફરિયાદના આધારે ગુનો નોંધી આરોપીને ઝડપી પાડવાની કામગીરી હાથ ધરી છે.