અરે વાહ / 5G સર્વિસ શરૂ થતાંની સાથે જ ટેલિકોમ મંત્રીએ કરી બીજી મોટી જાહેરાત, સાંભળીને થઈ જશો ખુશ

• એક ઓક્ટોબરથી 4 દિવસની ઈન્ડિયા મોબાઈલ કોંગ્રેસ કાર્યક્રમનું આયોજન
• બધા વચ્ચે કેન્દ્રીય ટેલિકોમ મંત્રી અશ્વિની વૈષ્ણવે 6G નેટવર્ક વિશે કહ્યું કઇંક આવું 
• ભારતીય ડેવલપર્સ પાસે અનેક પેટેન્ટ ઉપલબ્ધ - અશ્વિની વૈષ્ણવ

દેશમાં 1 ઓક્ટોબરથી 5G સર્વિસ શરૂ થઈ છે અને  2023 સુધીમાં દેશભરમાં 5G સેવા દરેક લોકોને મળી રહેશે. ઈન્ડિયા મોબાઈલ કોંગ્રેસ 2022ની શરૂઆતના કાર્યક્રમમાં પીએમ મોદીએ 5G સર્વિસ શરૂ કરી હતી અને દિલ્હીના પ્રગતિ મેદાનમાં એક ઓક્ટોબરથી 4 દિવસની ઈન્ડિયા મોબાઈલ કોંગ્રેસ કાર્યક્રમનું આયોજન થઈ રહ્યું છે. આ કાર્યક્રમમાં ભારતના ત્રણ અગ્રણી ટેલિકોમ ઓપરેટરો - રિલાયન્સ જિયો, વોડાફોન આઈડિયા (Vi), અને એરટેલ ભારતમાં 5G ટેક્નોલોજીની ક્ષમતા દર્શાવવા માટે ટેકનિક ડેમો પણ પ્રદર્શિત કર્યો હતો. એક રિપોર્ટ અનુસાર ભારતમાં 5G રોલઆઉટના પહેલો તબક્કો ભારતના 13 મોટા શહેરોમાં એટલે કે અમદાવાદ, બેંગલુરુ, ચંદીગઢ, ચેન્નાઈ, દિલ્હી, ગાંધીનગર, ગુરુગ્રામ, હૈદરાબાદ, જામનગર, કોલકાતા, લખનઉ, મુંબઈ અને પુણેમાં થઈ શકે છે. હાલ દરેક લોકોનું એવું માનવું છે  કે 5G સર્વિસ ભારતમાં મોટું પરિવર્તન લાવશે. 

પણ આ બધા વચ્ચે કેન્દ્રીય ટેલિકોમ મંત્રી અશ્વિની વૈષ્ણવે 6G નેટવર્ક વિશે એક એવી વાત કહી છે હતી જેને સાંભળીને દરેક લોકો ખુશ થઈ ગયા છે. અશ્વિની વૈષ્ણવે જણાવ્યું હતું કે 6G નેટવર્કના વિકાસ માટે જરૂરી ઘણી તકનીકો ભારતીય ડેવલપર્સ પાસે ઉપલબ્ધ છે અને દેશની આવનારી પેઢીની ટેકનોલોજી ક્ષેત્રમાં અગ્રેસર રહશે.

5Gની તુલના કરતાં બે થી ત્રણ ગણી વધુ નેટવર્ક સ્પીડ 
પ્રધાનમંત્રી નરેન્દ્ર મોદીએ 5G સેવા શરૂ કર્યા પછી ઈન્ડિયા મોબાઈલ કોંગ્રેસ ખાતે ઈન્ડિયન ઈન્સ્ટિટ્યૂટ ઓફ ટેક્નોલોજી હૈદરાબાદ (IIT-હૈદરાબાદ)ની મુલાકાત સમયે અશ્વિની વૈષ્ણવે જણાવ્યું હતું કે IIT-હૈદરાબાદ અહીં 6G ટેક્નોલોજી પ્રોટોટાઇપનું પ્રદર્શન કરી રહ્યું છે' અને આ સાથે દાવો કર્યો હતો કે એમને 5G કરતાં બેથી ત્રણ ગણી વધારે નેટવર્ક સ્પીડ હાંસલ કરી છે.

ભારતીય ડેવલપર્સ પાસે અનેક પેટેન્ટ ઉપલબ્ધ 
અશ્વિની વૈષ્ણવે જણાવ્યું હતું કે, "હવે આપણે 6Gના વિકાસ અને લોન્ચિંગ વિશે આગળ રહેવું પડશે. ટેલિકોમ જગતને 5G થી 6G માં લઈ જવા માટે જરૂરી ઘણી તકનીકો વિકસાવવામાં આવી છે અને ભારતીય ડેવલપર્સ સમુદાય પાસે આ માટે ઘણી પેટન્ટ ઉપલબ્ધ છે. વડાપ્રધાન નરેન્દ્ર મોદી ઈચ્છે છે કે ભારત 6G નેટવર્ક માટે આગેવાની લે અને એટલા માટે આપણે 6G માં અગ્રેસર બનવું પડશે."

5G ટેરિફ અને કિંમતની જાહેરાત હજુ થઈ નથી 
જણાવી દઈએ કે 5G ટેરિફ અને કિંમતની હજુ સુધી કોઈ ટેલિકોમ કંપની દ્વારા જાહેરાત કરવામાં આવી નથી. પણ Jio દાવો કરે છે કે તેના 5G પ્લાન અન્ય ઓપરેટર્સ કરતા સસ્તા હશે. બીજી તરફ એરટેલ દ્વારા કહેવામાં આવ્યું હતું કે હાલના એમના એરટેલ સિમ 5G માટે તૈયાર છે.