તમારા કામનું / મુસાફરી કરતાં સમયે આવી પરિસ્થિતિમાં ખેંચી શકો છો ટ્રેનની ચેઈન, ખાસ જાણી લેજો રેલ્વેના આ નિયમ વિશે

• સમયાંતરે રેલ્વે તેના નિયમોમાં પણ ઘણા ફેરફાર કરતી રહે છે
• આ નિયમ તોડવા પર લોકોને જેલમાં જવું પડે 
• આ કારણોસર ટ્રેનની ચેન ખેંચી શકાય છે 

રેલ્વે દ્વારા દરરોજ લાખો લોકો મુસાફરી કરે છે અને આ કારણોસર રેલ્વે સમયાંતરે કે કોઈ તહેવાર પર સ્પેશ્યલ ટ્રેનો ચલાવવાથી લઈને બીજી ઘણી સુવિધાઓ પૂરી પાડે છે. આ સાથે જ સમયાંતરે રેલ્વે તેના નિયમોમાં પણ ઘણા ફેરફાર કરતી રહે છે. ભારતીય રેલ્વેના કેટલાક નિયમો પહેલાથી જ અસ્તિત્વમાં છે. રેલ્વેના ઘણા એવા નિયમો છે જેને તોડવા પર લોકોને જેલ પણ જવું પડે છે. ઘણી વખત અજાણ્યે ભૂલ કરવી પણ ભારે પડી શકે છે. 

જે લોકો ટેનમાં મુસાફરી કરતાં હશે એમને વધુ ખ્યાલ હશે કે ટ્રેનમાં ઇમરજન્સી એલાર્મ ચેન રાખવામાં આવે છે અને તેનો ઉપયોગ ઈમરજન્સીની સ્થિતિમાં કરવામાં આવે છે પણ મોટાભાગના લોકો તેનો બિનજરૂરી ઉપયોગ કરે છે.ઘણી વખત એવું બને છે કે એ સ્ટોપ ન હોય ત્યારે પણ ઘણી જગ્યાએ તેનો ઉપયોગ કરીને ટ્રેનને રોકી દેવામાં આવે છે. આવી સ્થિતિમાં રેલ્વેએ આ અંગે કડક નિયમો બનાવ્યા છે. 

દંડની સાથે જેલ પણ થઈ શકે છે 
રેલ્વેએ જણાવ્યું હતું કે જો કોઈ વ્યક્તિ બિનજરૂરી રીતે ટ્રેનની ચેઈન ખેંચે છે તો તેને ગુનો ગણવામાં આવશે અને આ માટે ટ્રેનનો ચેન ખેંચનાર વ્યક્તિને જેલ જવું પડી શકે છે. રેલ્વે એક્ટ 1989ની કલમ 141 હેઠળ કાર્યવાહી કરીને જે વ્યક્તિ રેલ્વે ટ્રેનને રોકે છે તેના પર 1000 રૂપિયાનો દંડ થઈ શકે છે. આ સિવાય 1 વર્ષ સુધીની જેલ પણ થઈ શકે છે. કેટલાક કિસ્સાઓમાં બંને સજા પણ થઈ શકે છે. જો કે ટ્રેનની ચેઈન ખેંચવા પાછળ કોઈ નક્કર કારણ હોય તો જ તેને માફ કરી શકાય. મોટાભાગના લોકોએ આ સુવિધાનો દુરુપયોગ ન કરવો જોઈએ, જેના કારણે રેલ્વેએ અમુક નિયમ બનાવ્યો છે. 

આ કારણોસર ટ્રેનની ચેન ખેંચી શકાય છે 

1. જો ચાલતી ટ્રેનમાં આગ લાગે તો તમે ટ્રેનની ચેન ખેંચી શકો છો.
2. જો કોઈ વૃદ્ધ કે અપંગ વ્યક્તિને ચઢવામાં તકલીફ પડી રહી હોય અને ટ્રેન દોડવાની તૈયારીમાં હોય તો આવા સમયે ટ્રેનની ચેઈન ખેંચી શકાય છે.
3. જો કોઈના બાળકને સ્ટેશન પર છોડીને ટ્રેન રવાના થવાની હોય, તો તમે ઈમરજન્સી એલાર્મ ચેક ચેઈનનો ઉપયોગ કરી શકો છો.
4. મુસાફરની તબિયત ખરાબ હોય તો પણ ચેન ખેંચી શકાય છે.