પેટ્રોલ પંપ પર દરેક વ્યક્તિ અને સામાન્ય માણસ પણ અવારનવાર જતો હોય છે. દેશમાં એવો કોઈ વ્યક્તિ નહીં હોય જે પેટ્રોલ કે ડીઝલ ભરાવવા પેટ્રોલ પંપ પર ન જતો હોય. પેટ્રોલ ભરાવવા તમારી પાસે રૂપિયા હોવા જરૂરી છે. કારણ કે તે મફતમાં મળતું નથી પણ શું તમને એ ખબર છે કે અહીં કેટલીક એવી સુવિધાઓ તમે મેળવી શકો છો જો સંપૂર્ણ રીતે ફ્રી છે. જો આ સુવિધાઓ દેશના કોઈ પણ પેટ્રોલ પંપ પર ન મળે તો તમે તેને માટે ફરિયાદ કરી શકો છો. એટલું નહીં તમારી ફરિયાદ સાચી હશે તો તે પેટ્રોલ પંપને દંડ પણ થઈ શકે છે અને તેનું લાયસન્સ પણ કેન્સલ થઈ શકે છે.
પેટ્રોલ પંપ પર આ છે તમારા અધિકાર
આ 9 સુવિધાઓ દેશના કોઈ પણ પેટ્રોલ પંપ પર ફ્રીમાં મળશે
કોઈ અસુવિધા હોય તો ફરિયાદ કરવાથી પેટ્રોલ પંપને થશે દંડ
ઈંધણની ક્વોલિટી અને ક્વોન્ટિટી જાણવાનો અધિકાર
કોઈ પણ ગ્રાહકને ઈંધણની ક્વોલિટી અને ક્વોન્ટિટી જાણવાનો અધિકાર છે. પેટ્રોલ પંપના માલિકો તેને માટે વ્યવસ્થા કરે છે. જો તમને કોઈ પણ કારણ સર આ સુવિધા મળી રહી નથી તો તમે તે માટે ફરિયાદ કરી શકો છો.
કંપનીનું નામ અને કોન્ટેક્ટ નંબર લખેલો હોવો અનિવાર્ય
પેટ્રોલ પંપના માલિકે પેટ્રોલિયમ કંપનીનું નામ અને કોન્ટેક્ટ નંબર લખીને લટકાવવો જરૂરી છે. આ રીતે ગ્રાહકોને પેટ્રોલ પંપ માલિક કે સંબંધિત કંપનીનો સંપર્ક કરવાની સુવિધા મળે છે.
પેટ્રોલ પંપ ખોલવાનો અને બંધ કરવાનો સમય
દરેક પેટ્રોલ પંપ પર તેના ખૂલવાનો અને બંધ થવાનો સમય નોટિસ રૂપે લગાવાય તે જરૂરી છે. આ સાથે પેટ્રોલ પંપ કયા દિવસે બંધ રહેશે તેની જાણકારી પણ આપવી અનિવાર્ય છે.
પેટ્રોલ અને ડીઝલનું બિલ લેવાનો અધિકાર
પેટ્રોલ પંપ પર પેટ્રોલ કે ડીઝલ ભરાવ્યા બાદ તમને બિલ લેવાનો અધિકાર છે. જો કોઈ કારણ સર પેટ્રોલ પંપ માલિક કે તેના એજન્ટ તમને બિલ આપવાની મનાઈ કરે છે તો તમે તેની ફરિયાદ કરી શકો છો.
હવા ભરાવવાને લઈને અધિકાર
દરેક પેટ્રોલ પંપ પર ગાડીમાં હવા ભરાવવાની સુવિધા આપવી અનિવાર્ય છે. આ માટે પેટ્રોલ પંપ ડીલરે પોતાના પંપ પર હવાનું ઈલેક્ટ્રોનિક મશીન અને હવા ભરનારા વ્યક્તિની નિમણૂંક કરવી જરૂરી છે. આ સર્વિસ માટે પેટ્રોલ પંપ માલિક કે અપોઈન્ટ કરેલી વ્યક્તિ તમારી પાસે પૈસા માંગી શકતી નથી. જો કોઈ પૈસા માંગે છે તો તેની વિરુદ્ધમાં તમે ફરિયાદ કરી શકો છો.
પીવાનું શુદ્ધ પાણી મળે
પેટ્રોલ પંપ ડીલરને પોતાના પંપ પર સામાન્ય લોકોની સુવિધા માટે ફ્રીમાં પાણીની સુવિધા આપવાની રહેશે. પેટ્રોલ પંપ ડીલરે આરઓ મશીન, વોટર કૂલર અને પાણીનું કનેક્શન જાતે લગાવવાનું રહેશે. જો કોઈ પંપ પર પીવાના પાણીની સુવિધા નથી તો તમે તેની વિરુદ્ધમાં ફરિયાદ કરી શકો છો.
ઈમરજન્સીમાં ફોન કોલને મળી છે મંજૂરી
જો તમે રસ્તામાં કોઈ મુશ્કેલીમાં અટવાયા છો અને મોબાઈલની સુવિધા ન હોય તો ગભરાઓ નહીં. તમે કોઈ પણ પેટ્રોલ પંપ પર જઈને કોઈ એક નંબર પર ફ્રીમાં કોલ કરી શકો છો. આ માટે પેટ્રોલ પંપ પર તૈનાત કર્મચારી કે મેનેજર તમને ના કહી શકશે નહીં. આ સુવિધા પેટ્રોલ પંપ પર ફ્રીમાં મળે છે.
શૌચાલયની સુવિધા
પેટ્રોલ પંપ પર સ્વસ્છ શૌચાલયની સુવિધા મળવી જરૂરી છે. તેનો ઉપયોગ કરવા માટે તમને કોઈ અટકાવી શકે નહીં. જો તમે પેટ્રોલ પંપ પર આ સુવિધા સારી રીતે મેળવી શકતા નથી તો તમે તેની ફરિયાદ નોંધાવી શકો છો.
ફર્સ્ટ એડ બોક્સની સુવિધા
દરેક પેટ્રોલ પંપ પર એક ફર્સ્ટ એડ બોક્સની સુવિધા હોવી જોઈએ. જરૂર પડે નાગરિક તેનો ઉપયોગ કરી શકે. આ બોક્સમાં સામાન્ય દવાઓ અને બેન્ડેજનો સામાન જરૂરી છે. દવાઓ પર એક્સપાયરી ડેટ દેખાય તેવી હોવી જોઈએ. જો કોઈ પેટ્રોલ પંપ ફર્સ્ટ એડ બોક્સ આપવાની ના પાડે છે તો તમે તેની વિરુદ્ધમાં લેખિત ફરિયાદ કરી શકો છો.
આ રીતે કરી શકાશે ફરિયાદ
દરેક પેટ્રોલ પંપમાં ફરિયાદી બોક્સ કે રજિસ્ટર્ડ બોક્સ હોય છે. ગ્રાહક તેમાં પોતાની ફરિયાદ નોંધાવી શકે છે. જો તમે પેટ્રોલ પંપ પર ઉપરની કોઈ પણ સુવિધા મેળવી શકતા નથી તો તમે સેન્ટ્રલાઈઝ્ડ પબ્લિક ગ્રીવેન્સ રિડ્રેસ અને મોનિટરિંગ સિસ્ટમના પોર્ટલ એટલે કે https://pgportal.gov.in/ પર જઈને ઓનલાઈન તમારી ફરિયાદ નોંધાવી શકો છો.