તમે ક્યાં રહો છે એની અસર તમારા આખા શરીર પર પડે છે. ખાસ કરીને વિકાસના સમયગાળા દરમિયાન આસપાસની આબોહવા અને હવાનું પ્રેશર શરીરના બંધારણ પર ખૂબ ઊંડી અસર છોડે છે. તાજેતરમાં યુનિવર્સિટી ઓફ કેમ્બ્રિજના નિષ્ણાતોએ દરિયાની સપાટીથી વિવિધ ઊંચાઈએ જન્મેલા અને ઊછરેલા લોકોના શારીરિક બંધારણનો અભ્યાસ કર્યો હતો.
તેમના કહેવા મુજબ ખૂબ ઊંચાઈ પર જન્મેલા અને ઊછરેલા લોકોનો કોણીથી પંજા સુધીનો ભાગ ટૂંકો હોય છે અને કોણીથી ખભા સુધીના અપર આર્મની લંબાઈ નીચાણમાં ઊછરેલા લોકો જેટલી જ સાઈઝની હોય છે. ઊંચાઈ પર ઓક્સિજન પાતળો હોવાથી આમ થાય છે. હાયરએ ઓલ્ટિટ્યૂટ પર ઓક્સિજન ઓછો મળતો હોવાથી ખોરાકમાંથી એનર્જીનું કન્વર્ઝન થવાની ક્ષમતા ઘટી જાય છે.
આવા સમયે શરીરના છેવાડાના ભાગોમાં પૂરતી ઊર્જા પહોંચતી નથી અને એ ભાગનો ગ્રોથ સામાન્ય કરતાં થોડોક ઓછો રહે છે. તેથી ઊંચાઈ પર રહેતા લોકોનાં હાથ-પગનાં મોટાં હાડકાં નબળાં રહી ગયાં હોય એવું બની શકે છે.