સી-પ્લેન છેલ્લા 200 દિવસથી રિપેરિંગમાં ગયેલું છે, તે હજુ સુધી પરત નથી આવ્યું ત્યાં અમદાવાદીઓને દિવાળી સમયે AMC નવી ભેટ આપશે. અમદાવાદની શાન ગણાતા રિવરફ્રન્ટ પર વધુ એક સુવિધામાં ઉમેરો થવા જઇ રહ્યો છે.
અમદાવાદ રિવરફ્રન્ટ પર યોટ રેસ્ટોરન્ટ
બોટિંગ સાથે ખાણીપીણીની સુવિધા
ગેસ, ફ્રિઝ, બેડ સહિતની યોટમાં સુવિધા
અમદાવાદમાં ફરવા માટે અનેક સ્થળો છે, પરંતુ વીકએન્ડમાં પરિવાર સાથે ટૂંકા સમયગાળામાં ફરવા જેવી જગ્યા એટલે રિવરફ્રન્ટ છે. અમદાવાદીઓ રિવરફ્રન્ટને ખુબ જ પસંદ કરે છે. ત્યારે આ રિવરફ્રન્ટનું આકર્ષણ વધારવા માટે સમયાંતરે નવી નવી સુવિધાઓનો ઉમેરો થઇ રહ્યો છે. ત્યારે હવે AMC દિવાળીમાં અમદાવાદીઓને નવી ભેટ આપી રહ્યું છે. અમદાવાદ રિવરફ્રન્ટ પર યોટ રેસ્ટોરન્ટ શરૂ થશે.
રિવરફ્રન્ટ પર શરૂ થશે યોટ રેસ્ટોરન્ટ
અમદાવાદીઓ બોટિંગ સાથે ખાણીપીણીની મજા પણ માણી શકશે. યોટમાં એકસાથે 13 લોકો મુસાફરીનો આનંદ લઈ શકશે. યોટમાં ગેસ, ફ્રિઝ અને બેડની પણ સુવિધા મળશે. યોટમાં મુસાફરી માટે જુદા જુદા પેકેજની વ્યવસ્થા કરવામાં આવી છે. રિવરફ્રન્ટ પર વધુ એક નજરાણું ઉમેરાતા પ્રવાસીઓની સંખ્યામાં વધારો થશે.
પીએમ મોદીના સપનાનું સી-પ્લેન મેઈનટેનન્સમાં ગયું તે ગયું, હજુ સુધી પરત નથી આવ્યું
પ્રધાનમંત્રી નરેન્દ્રભાઈ મોદીએ ‘રાઈટ બ્રધર્સની મદદથી અમદાવાદની સાબરમતી નદીથી કેવડીયા કોલોનીમાં નર્મદા નદી સુધી સી-પ્લેન ઉડાન ભરી હતી. તે સમયે આખા ગુજરાતમાં આનંદ વ્યાપી ગયો હતો. પરંતુ ત્યારબાદ સી-પ્લેન કયારે ઉડ્યું તે દિવસો તો આંગળીના વેઢે ગણી શકાય તેમ છે. છેલ્લે ઉડ્યા બાદ હવે તે નથી ઉડ્યું તેને અંદાજે 200 જેટલા દિવસ થયા છે, તે રીપેર કરવા ગયું તે ગયું. 50 વર્ષ જૂનુ સી-પ્લેન તેની સેવાના 28 દિવસમાં જ બગડયું હતું. ત્યારબાદ અનેક વખત તે ફીવરમાં ગયું પણ છેલ્લા 200 દિવસ બાદ હજું આવ્યું નથી અને હજું દેશભરમાં આ પ્રકારે સી-પ્લેનના સ્વપ્ના સેવાય છે.
અમદાવાદીઓ માટે અન્ય આકર્ષણો
મહત્વનું છે કે, રિવરફ્રન્ટ પર સાઈકલિંગથી માંડીને અવનવી રાઈડ પણ ઉપલબ્ધ છે. અગાઉ રિવરફ્રન્ટ ખાતે એકવા સાઈકલ (100 રુપિયા), એકવા રોલર (100 રુપિયા), કિડ્સ બોટ(150 રુપિયા), જેટસ્કી(400 રુપિયા) અને ઝોર્બિંગ બોલ (100 રુપિયા) રિવર ક્રૂઝ સહિતની વોટર રાઈડ શરૂ કરવામાં આવી હતી. હવે આ જ પગલે એક નવી બોટનો પણ સમાવેશ થયો છે.
ક્રૂઝ, બોટિંગ અને વોટર સાઈકલિંગની મજા
સાબરમતી રિવરફ્રન્ટ ખાતે બોટિંગ અને વોટર સાયકલિંગ શરૂ કરવામાં આવી હતી. જેમાં સ્પીડ બોટ, સ્કૂટર અને 2 લોકો બેસી શકે તેવી સાયકલ પણ લાવવામાં આવી હતી. તો રિવરફ્રન્ટ પર સહેલાણીઓ માટે ક્રૂઝ પણ મુકવામાં આવ્યું હતું. આ ક્રૂઝમાં વ્યક્તિ દીઠ 10થી 15 મિનિટનો ચાર્જ રૂપિયા 200 લેવામાં આવે છે.