યોજના / યોગી સરકારનો મોટો એક્શન પ્લાન, માત્ર 100 દિવસમાં 1 હજાર ગુનેગારોને સજા અપાવવાનો ઘડી નાખ્યો તખ્તો

• યુપીમાં યોગી સરકાર ફરી વાર એક્શન મોડમાં
• 100 દિવસમાં 1 હજાર ગુનેગારોને સજા અપાવશે
• મહિલાઓ અને બાળકો પર અત્યાચાર કરનારાઓની પણ ખેર નહીં

ઉત્તર પ્રદેશમાં યોગી 2.0 સરકાર બન્યા બાદથી જ સરકાર કાયદો અને વ્યવસ્થાના મુદ્દે સતત ભાર આપી રહી છે. ત્યારે કાયદો અને વ્યવસ્થાને વધુ મજબૂત કરવા સરકાર સતત અસરકારક યોજના બનાવી રહી છે. મહિલાઓ અને છોકરીઓ વિરુદ્ધના ગુનાઓમાં વધુ કડક કાર્યવાહી કરવી એ મુખ્યમંત્રી યોગી આદિત્યનાથની પ્રાથમિકતાઓમાં સામેલ છે.

સરકાર એક હજાર ગુનેગારોને સજા કરશે

રાજ્યમાં આગામી 100 દિવસમાં મહિલાઓ સામેના ગુનાઓ અને POCSO (પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ) એક્ટના કેસમાં 1000 ગુનેગારોને સજા આપીને મજબૂત સંદેશ આપશે. આ સાથે POCSO એક્ટના મામલામાં આરોપીઓને એક મહિનાની અંદર સજા સુનિશ્ચિત કરવાનું લક્ષ્ય નક્કી કરવામાં આવ્યું છે.

માફિયા, પોલીસ સ્ટેશન અને જિલ્લા કક્ષાના ટોચના 10 ગુનેગારોને સજા અપાવવા અસરકારક વકીલાતની સાથે-સાથે ફરિયાદી અધિકારીઓ અને પોલીસ સ્ટેશનના સ્તર પર જવાબદારી નક્કી કરવામાં આવશે. આર્મ્સ એક્ટના 90 ટકા કેસમાં સજા લાવવાનો પણ પ્રયાસ કરવામાં આવશે.

કાયદો અને વ્યવસ્થા મજબૂત કરવા ગૃહ વિભાગે બનાવ્યો એક્શન પ્લાન

ગૃહ વિભાગે આગામી 100 દિવસમાં બુનિયાદી પોલીસિંગના ઈન્ફ્રાસ્ટ્રક્ચરને વધુ મજબૂત કરવા એક એક્શન પ્લાન તૈયાર કર્યો છે. જે અંતર્ગત આગામી 100 દિવસમાં રખડતી ટોળકીની અસામાજિક પ્રવૃતિઓને ડામવામાં આવશે, માફિયા ગેંગ સામે ઝુંબેશ અંતર્ગત કાર્યવાહી કરવામાં આવશે, ગેરકાયદેસર હથિયાર અને દારૂની હેરાફેરી કરનારાઓ સામે અસરકારક કાર્યવાહી કરવામાં આવશે, નકલી ચલણના દાણચોરો સામે કડક કાર્યવાહી કરવામાં આવશે.

સરકાર વધારશે પોલીસકર્મીઓની સુવિધાઓ

શાંતિ જાળવણીની ફરજ પર રાત-દિવસ ઊભા રહેતા પોલીસકર્મીઓની સુવિધાઓમાં પણ સરકાર વધારો કરશે. આ અંતર્ગત રૂ. 3042 કરોડથી વધુના ખર્ચે નિર્માણ કાર્ય શરૂ કરવામાં આવશે. જે અંતર્ગત 10 પોલીસ લાઈનમાં ટ્રાન્ઝિટ હોસ્ટેલ, 23 ફાયર સ્ટેશન, 21 પોલીસ સ્ટેશનની વહીવટી ઇમારતો, 10 પોલીસ સ્ટેશનની રહેણાંક ઇમારતો, આઠ પોલીસ ચોકીઓની રહેણાંક ઇમારતો અને ચોકીઓની વહીવટી ઇમારતો, પાંચ ફોરેન્સિક સાયન્સ લેબોરેટરીઓ, એટીએસ કચેરીઓના ત્રણ યુનિટ અને ચાર એસટીએફ. યુનિટ ઓફિસ, સાત અધિકારક્ષેત્ર કચેરીઓ, પાંચ અધિકારક્ષેત્રના રહેઠાણો, લખનઉમાં પોલીસ કમિશનરની ઓફિસ, ક્રાઈમ બ્રાન્ચ ચંદૌલી, ચાર પોલીસ સ્ટેશન હાસ્ટલ બૈરેક, બે નવા બનેલા જિલ્લાઓમાં પોલીસ લાઈન્સ, મહિલા PSI બટાલિયન ગોરખપુર, સાત પોલીસ તાલીમ શાળાઓનું વિસ્તરણ વગેરે સામેલ છે.