યસ બેંક લોન કૌભાંડના કેસમાં બિઝનેસ બ્રધર્સ કપિલ વધાવન અને ધીરજ વધાવસને કોર્ટના જામીન મળી ગયા છે. એન્ફોર્સમેન્ટ ડિરેક્ટોરેટ ED તેમની સામે નિર્ધારિત સમયગાળા 60 દિવસની અંદર ચાર્જશીટ ફાઇલ કરવામાં નિષ્ફળ ગઈ છે.
બંને ભાઈઓ હજુ રહેશે જેલમાં
જો કે બંને ભાઈઓ દિવાન હાઉસિંગ ફાઇનાન્સ કોર્પોરેશન DHFLના પ્રમોટર્સ તરીકે હજી પણ જેલમાં રહેશે કારણ કે તેમની સામે CBIનો કેસ પણ ચાલી રહ્યો છે. આ કેસની સુનાવણી દરમિયાન બોમ્બે હાઈકોર્ટના જસ્ટિસ ભારતી ડાંગરેએ બંને ભાઈઓને 1 લાખ રોકડનો બોન્ડ અને પાસપોર્ટ જમા કરવાની શરતે જામીન આપ્યા હતા.
શું છે મામલો?
નોંધનીય છે કે બંને ભાઈઓની મની લોન્ડરિંગના કેસમાં ED દ્વારા 14 મેના રોજ ધરપકડ થઇ હતી. CBIએ 7 માર્ચના રોજ વધાવન બંધુઓ સામે FIR દાખલ કરી હતી. તેમાં એવો આરોપ મુકવામાં આવ્યો હતો કે યસ બેંકના પ્રમોટર રાણા કપૂર અને વધાવન ભાઈઓએ એક બીજા સાથે મિલીભગત કરી અને ખોટી રીતે યસ બેંકે વધાવન ભાઈઓ માટે લોન્સ મંજૂર કરી દીધી.
આ પછી EDએ વધાવન ભાઈઓ, રાણા કપૂર, બિંદુ કપૂર તેમની દીકરી રોશની અને રેખા અને તેમના ચાર્ટર્ડ એકાઉન્ટન્ટ ફર્મ D K જૈન એન્ડ એસોસિએટ્સ વિરુદ્ધમાં 15 જુલાઈના રોજ કેસ દાખલ કર્યો હતો.
પ્રોપર્ટીઝ થઇ છે જપ્ત
આ જુલાઈ મહિનામાં EDએ બેંકના પૂર્વ પ્રમુખ રાણા કપૂર અને DHFLના પ્રમોટર્સ કપિલ વધાવન અને ધીરજ વધાવનની 2400 કરોડની પ્રોપર્ટી જપ્ત કરી છે. એમાં રાણા કપૂરની 1000 કરોડની પ્રોપર્ટી અને વધાવન ભાઈઓની 1400 કરોડની પ્રોપર્ટીનો સમાવેશ થાય છે.
રાણા કપૂરના દિલ્હીના પોશ વિસ્તાર અમૃતા શેરગિલ માર્ગ ઉપર સ્થિત બંગલોને પણ જપ્ત કરવામાં આવ્યો છે. આ ઉપરાંત મુંબઇના પેડર રોડ અને લંડન અને ન્યુ યોર્ક સ્થિત ઘણી પ્રોપર્ટીને EDએ જપ્ત કરી છે. વધાવન ભાઈઓની જપ્ત પ્રોપર્ટીમાં 12 એપાર્ટમેન્ટ, પુણેમાં જમીન, લંડન, ઓસ્ટ્રેલિયા અને ન્યુ યોર્કમાં પ્રોપર્ટી સામેલ છે.