RBIની જાહેરાત બાદ આજે બીજા દિવસે પણ યસ બેંકમાં ખાતેદારોની લાઇનો લાગી છે. રિઝર્વ બેંક દ્વારા યસ બેંકમાંથી એક મહિનામાં 50 હજાર રૂપિયા સુધી ઉપાડવાની લીમીટ જાહેર કરાઈ છે. જેના કારણે ખાતેદારો રૂપિયા ઉપાડવા માટે લાઈનમાં લાગ્યા છે. રાજ્યના અમદાવાદ, સુરત, વડોદરા અને રાજકોટ શહેરમાં ખાતેદારો સવારથી જ લાઇનમાં ઉભા રહેલા જોવા મળી રહ્યાં છે.
અમદાવાદમાં યસ બેન્કમાં લાગી ખાતેદારોની લાઇન
રાજકોટમાં યસ બેંકના ખાતેદારો અટવાયા
RBIના નિર્ણય બાદ આજે બીજા દિવસે પણ યસ બેંક બહાર લાઈન
અમદાવાદના પકવાન ચાર રસ્તા પાસે આવેલી યસ બેંકની બ્રાંચમાં ખાતેદારોને ટોકન આપવામાં આવ્યા છે. તહેવારમાં પૈસા લેવા માટે ખાતેદારો નોકરી-ધંધા બંધ કરીને લોકો લાઈનમાં લાગ્યા છે. જ્યારે સુરતમાં પણ યસ બેંકની બહાર ખાતેદારોની લાઈન જોવા મળી છે.
બેંક ઉઠી જવાના ડરથી ખાતેદારો રૂપિયા ઉપાડવા માટે બેંકમાં પહોંચ્યા છે. જો કે યસ બેંકના ATMમાં માત્ર 30 મીનીટમાં રૂપિયા ખાલી થઈ જતાં લોકો પરેશાન થઈ ગયા છે. આ તરફ વડોદરામાં પણ યસ બેંકના ખાતેદારો રૂપિયા લેવા ATM પહોંચી રહ્યાં છે.
વડોદરાની યસ બેંકના ATMમાંથી રૂપિયા નીકળે છે. રાવપુરના ATMમાંથી 4 હજાર રૂપિયા નીકળી રહ્યાં છે. જ્યારે રાજકોટમાં યસ બેંકના ખાતેદારો અટવાયા છે. યસ બેંકના ATMમાં નાણાં ખૂટતા લોકો અટવાયા છે...હોળીના તહેવારમાં લોકો મુશ્કેલીમાં મુકાયા છે.