ગુજરાત અને પશ્ચિમ રાજસ્થાનમાં આગામી બે દિવસ સુધી તાપમાન 37થી 39 ડિગ્રી વચ્ચે રહેવાની સંભાવના, આ વર્ષે રેકોર્ડબ્રેક હીટવેવ હાહાકાર મચાવશે
સીઝનનું પ્રથમ હીટવેવ એલર્ટ જાહેર
પહાડો પર પણ ગરમી 30 ડિગ્રીને પાર
ગોવામાં ગરમીએ 10 વર્ષનો રેકોર્ડ તોડ્યો
દેશના મોટા ભાગના રાજ્યોમાંથી હવે ઠંડીએ વિદાય લીધી છે અને આ દરમિયાન દેશના અનેક રાજ્યોના તાપમાનમાં ઉછાળો પણ આવવા લાગ્યો છે. હવામાન વિભાગના જણાવ્યા અનુસાર બિહારથી લઈને રાજસ્થાન સુધી તાપમાનના પારામાં મહદ્અંશે વધારો થયો છે. ગુજરાત અને પશ્ચિમ રાજસ્થાનમાં આગામી બે દિવસ સુધી તાપમાન 37થી 39 ડિગ્રી વચ્ચે રહેવાની સંભાવના છે. આગામી દિવસોમાં હજુ પણ તાપમાનમાં જોરદાર વધારો થશે. હવામાન વિભાગનું માનવું છે કે આ વર્ષે રેકોર્ડબ્રેક હીટવેવ સમગ્ર દેશમાં હાહાકાર મચાવશે.
દેશના કેટલાય રાજ્યોના મોસમમાં બદલાવ આવતાં હવામાન વિભાગે આ વર્ષનું પ્રથમ હીટવેવ એલર્ટ જાહેર કરી દીધું છે. આ એલર્ટમાં કચ્છ અને કોંકણ વિસ્તારના કેટલાક ભાગોમાં મહત્તમ તાપમાન 37 થી 39 ડિગ્રી સેલ્સિયસ સુધી વધવાની આગાહી કરવામાં આવી છે.હવામાન વિભાગે જણાવ્યું છે કે, આ વર્ષે વસંતના આગમન પહેલાં જ ગરમીની સીઝન શરૂ થઈ જશે અને લોકોને આ વર્ષે ગરમી ખૂબ જ દઝાડશે તેમજ રેકોર્ડબ્રેક હીટવેવ દેશમાં હાહાકાર મચાવશે. દેશના પહાડી વિસ્તારોમાં જોરદાર હિમવર્ષા થવા છતાં કેટલાક સ્થળોએ તાપમાનનો પારો 30 ડિગ્રીને વટાવી ગયો છે. જ્યારે મેદાની વિસ્તારોમાં આગામી બે-ત્રણ દિવસમાં તાપમાન 40 ડિગ્રીની નજીક પણ પહોંચી જશે. હિમાચલ પ્રદેશના શિમલામાં મહત્તમ તાપમાન 23.2 ડિગ્રી નોંધાયું હતું.
રવિવારે દિલ્હીમાં તાપમાન 31.5 ડિગ્રી નોંધાયું હતું. છેલ્લા 14 વર્ષમાં પ્રથમ વાર ફેબ્રુઆરીના પ્રારંભિક દિવસોમાં તાપમાનનો પારો આટલો ઊંચો ગયો છે, જોકે ભારતીય હવામાન વિભાગના વૈજ્ઞાનિક ડો.નરેશે જણાવ્યું છે કે હજુ પશ્ચિમ હિમાચલ ક્ષેત્રમાં એક વેસ્ટર્ન ડિસ્ટર્બન્સની અસર જોવા મળશે. ખાસ કરીને જમ્મુ-કાશ્મીર તેમજ હિમાચલ પ્રદેશ અને ઉત્તરાખંડમાં બે દિવસ સુધી તેની અસર વર્તાશે.
હવામાન વિભાગના જણાવ્યા અનુસાર ફેબ્રુઆરી મહિનામાં તટીય રાજ્યોમાં અસામાન્ય ગરમી જોવા મળશે. ગુજરાત, મહારાષ્ટ્ર અને ગોવામાં તાપમાન સામાન્યથી સરેરાશ પાંચથી 10 ડિગ્રી વધુ નોંધાઈ રહ્યું છે. મહારાષ્ટ્રના રત્નાગિરિમાં 1969 બાદ પ્રથમ વાર મહત્તમ તાપમાન 39.4ડિગ્રી સેલ્સિયસ નોંધાયું હતું.
ગોવામાં ગરમીએ 10 વર્ષનો રેકોર્ડ તોડ્યો
ગોવાની રાજધાની પણજીમાં 16 ફેબ્રુઆરીએ મહત્તમ તાપમાન 38.2 ડિગ્રી સેલ્સિયસ નોંધાયું હતું અને આ સાથે ગોવામાં ગરમીનો છેલ્લા 10 વર્ષનો રેકોર્ડ તૂટી ગયો છે. સ્થાનિક હવામાન વિભાગના જણાવ્યા અનુસાર 1969થી 2023 વચ્ચે કુલ ૧૪ દિવસ એવા રહ્યા છે, જ્યારે પણજીમાં મહત્તમ તાપમાન 38 ડિગ્રી સેલ્સિયસ કે તેનાથી વધુ નોંધાયું હોય. 1989ની 7 એપ્રિલે ગોવામાં 39.8 ડિગ્રી તાપમાન નોંધાયું હતું. એવી આગાહી કરવામાં આવી છે કે, આજથી તાપમાનમાં બેથી ત્રણ ડિગ્રીનો ઘટાડો થઈ શકે છે.