ટીકા-ટિપ્પણી / યશવંત સિંહાનો દાવોઃ અટલજી નરેન્દ્ર મોદી કરવા માંગતા હતા બરખાસ્ત, અડવાણીએ બચાવ્યા

ભોપાલમાં યોજાયેલ 'પ્રેસને મળીયે' કાર્યક્રમમાં આ વિષયના સંદર્ભમાં પૂછાયેલ એક સવાલના જવાબમાં ભાજપના પૂર્વ કદાવર નેતા સિંહાએ જણાવ્યું હતું કે, આ વાત એકદમ સાચી છે કે, પૂર્વ વડાપ્રધાન અટલ બિહારી વાજપેયીએ ગુજરાતમાં થયેલ સાંપ્રદાયિક તોફાનો બાદ નક્કી કરી લીધું હતું કે, ગુજરાતના તત્કાલિન મુખ્યપ્રધાન નરેન્દ્ર મોદીએ રાજીનામું ધરી દેવું જોઇએ. તેમણે કહ્યું કે, ગોવામાં ભાજપની રાષ્ટ્રીય કાર્યસમિતિની બેઠક થઇ હતી જેમાં અટલજી નક્કી કરીને આવ્યા હતા કે, મોદીજી રાજીનામું નહીં આવે તો તેમને પદથી હટાવી દેવામાં આવશે. 

સિંહાએ જણાવ્યું કે, આ વિષયના સંદર્ભમાં પાર્ટીની ખાસ બેઠક મળી હતી. જેમાં મને જાણકારી છે ત્યાં સુધી અડવાણીજીએ આ વાતનો વિરોધ કર્યો હતો અને અટલજીને ત્યાં સુધી કહ્યું હતું કે, જો મોદીજીને તમે પદથી હટાવશો તો હું સરકારની ગૃહમંત્રી પદેથી રાજીનામું ધરી દઇશ. અંતે આ વાત ત્યાં જ અટકી રહી અને નરેન્દ્ર મોદી ગુજરાતના મુખ્યપ્રધાન પદે યથાવત રહ્યા.

મોદી અને ભાજપના રાષ્ટ્રીય અધ્યક્ષ અમિત પર કટાક્ષ કરતા કહ્યું કે, ભાજપા હવે અટલ-અડવાણીના જમાનાની ભાજપ રહી નથી. અટલજીના જમાનામાં વિચારધામાં ભેદ નહોંતો. ત્યારે ઉદારવાદી દોર ચાલતો હતો. જે આજની ભાજપમાં સમાપ્ત થઇ ચૂક્યો છે.