યશ ચાવડેએ સિદ્ધેશ્વર વિદ્યાલયની સામે 508 રનની અણનમ ઈનિંગ રમી
યશે આશરે 178 બોલમાં અણનમ 508 રન ફટકાર્યા
યશે આ ઈનિંગમાં કુલ 99 બાઉન્ડ્રીઝ ફટકારી
13 વર્ષીય યશ ખાવડેએ રેકોર્ડબ્રેક ઈનિંગ રમી
નાગપુરમાં રમાતી અંડર-14 ઈન્ટર-સ્કૂલ ક્રિકેટ ટુર્નામેન્ટમાં 13 વર્ષીય યશ ખાવડેએ રેકોર્ડબ્રેક ઈનિંગ રમી છે. યશે આશરે 178 બોલમાં અણનમ 508 રન ફટકાર્યા છે. તેમણે પોતાની આ ઈનિંગમાં 18 છગ્ગા અને 81 ચોગ્ગાની મદદથી કુલ 99 બાઉન્ડ્રીઝ ફટકારી. કહેવાઈ રહ્યું છે કે આંતરરાષ્ટ્રીય ક્રિકેટથી લઇને કોઈ પણ સ્તર અને ફોર્મેટના ક્રિકેટમાં યશ 10મા એવા બેટર છે, જેમણે 500+ રનની ઈનિંગ રમી છે.
કોઈ પણ વિકેટ ગુમાવ્યાં વગર 714 રનનો વિશાળ સ્કોર ઉભો કર્યો
યશ ચાવડે સરસ્વતી વિદ્યાલયના બેટર અને કેપ્ટન છે. અહીં તેમની ટીમે પહેલા બેટીંગ કરીને મર્યાદિત 40 ઓવરમાં કોઈ પણ વિકેટ ગુમાવ્યાં વગર 714 રનનો વિશાળ સ્કોર ઉભો કર્યો. યશ ચાવડેની સાથે તેના સાથીદાર તિલક વાકોડેએ પણ 127 રનની અણનમ ઈનિંગ રમી. બાકી રન એકસ્ટ્રા મળ્યાં. 715 રનના લક્ષ્યના જવાબમાં સિદ્ધેશ્વર વિદ્યાલયની ટીમે આશરે 5 ઓવરમાં જ 9 રન પર 9 વિકેટ ગુમાવી. તેમના એક બેટરને ઈજા પણ થઇ. આ રીતે સરસ્વતી વિદ્યાલયે આ મેચ રેકોર્ડ 705 રનથી જીતી.
ક્રિકેટ સ્ટેટિશિયન મોહનદાસ મેનને એક અખબાર સાથેની વાતચીતમાં જણાવ્યું છે, મારા રેકોર્ડ્સ મુજબ, યશ ચાવડે બધી ઉંમર, સ્તર અને ફોર્મેટની ક્રિકેટમાં 10મા બેટર છે, જેમણે 500 રનના આંકડાને પાર કર્યો છે. આ યાદીમાં પાંચ ખેલાડી ભારતીય રહ્યાં છે. પ્રણવ ધનવડે, પ્રિયાંશુ મોલિયા, પૃથ્વી શૉ, ડેડી હાવેવાલા અને યશ ચાવડેએ એક ઈનિંગમાં 500થી વધુ રન બનાવ્યાં છે.