સ્માર્ટફોન કંપની Xiaomiના ફાઉન્ડર અને સીઈઓ લે જૂન (49)ને 96.1 કરોડ ડોલર(6,631 કરોડ રૂપિયા)ની વેલ્યુના 63.66 કરોડ શેર બોનસમાં મળ્યા છે. કંપનીમાં જૂનના યોગદાન માટે તેમને આ બોનસ આપવામાં આવ્યું છે. જૂન તમામ શેરનું દાન કરશે. કંપનીએ બુધવારે રેગ્યુલેટરી ફાઈલિંગમાં આ માહિતી આપી છે. જોકે એમ જણાવવામાં આવ્યું ન હતું કે દાન કોને આપવામાં આવશે.
ચીનમાં ગત વર્ષે સ્માર્ટફોનનું વેચાણ ઘટવાને કારણે Xiaomiના શેરની કિંમતમાં ઘટાડો થયો છે. તેને Samsung, Apple, Huawei, Oppo અને Vivoની સ્પર્ધાનો સામનો કરવો પડી રહ્યો છે. 10 વર્ષ જૂની કંપની Xiaomiનો શેર ગત વર્ષે જુલાઈમાં હોન્ગકોંગના શેર બજારમાં લિસ્ટ થયો હતો.
Xiaomiના શેરમાં ઘટાડો છતાં નેટવર્થ 11 અબજ ડોલર (75,900) છે. બ્લૂમબર્ગ બિલેનિયર ઈન્ડેક્સના જણાવ્યા પ્રમાણે વિશ્વના 500 અબજોપતિઓના લિસ્ટમાં તેમનો 126મો નંબર છે.
રિસર્ચ ફર્મ આઈડીસીના જણાવ્યા પ્રમાણે 2018માં Xiaomi વિશ્વની ચોથી મોટી સ્માર્ટફોન કંપની હતી. ગત વર્ષ કંપનીનો હેન્ડસેટ ડિલિવરી ગ્રોથ 32.2 ટકા રહ્યો.