ચીનની કમ્યુનિસ્ટ પાર્ટીની દર પાંચ વર્ષની એક વખતની કોંગ્રેસ 16 ઓક્ટોબરથી શરૂ થવા જઈ રહી છે. રીપોર્ટ મુજબ શી જિનપિંગ તેનો કાર્યકાળમાં વધારો કરશે
ચીનની 20મી પાર્ટી કોંગ્રેસની તારીખ જાહેર
જિનપિંગ આગામી કોંગ્રેસમાં પોતાનો કાર્યકાળ લંબાવે તેવી શક્યતા
પ્રીમિયર લી કેકિયાંગ સાથે અન્ય ઘણા સભ્યો થશે નિવૃત્ત
ચીનની કમ્યુનિસ્ટ પાર્ટીની દર પાંચ વર્ષની એક વખતની કોંગ્રેસ 16 ઓક્ટોબરથી શરૂ થવા જઈ રહી છે. સરકારી મીડિયાએ આ જાણકારી આપી છે. ચીનમાં આ કોંગ્રેસને ચીનના રાષ્ટ્રપતિ શી જિનપિંગના ત્રીજા કાર્યકાળની સત્તામાં આવવાની દિશામાં એક પગલું માનવામાં આવી રહ્યું છે. ચીનની ન્યૂઝ એજન્સી શિન્હુઆએ મંગળવારે યોજાયેલી પોલિટબ્યુરોની બેઠકનો હવાલો આપીને 20મી પાર્ટી કોંગ્રેસની તારીખ જાહેર કરી હતી. વર્ષ 2018માં જિનપિંગે રાષ્ટ્રપતિના કાર્યકાળની મર્યાદા ખતમ કરી દીધી હતી. જિનપિંગ આગામી કોંગ્રેસમાં પોતાનો કાર્યકાળ લંબાવે તેવી શક્યતા છે.
અનેક સરકારી હોદ્દાઓ પર થશે ફેરબદલ
આ કોંગ્રેસ આ વર્ષે ચીનની સૌથી મહત્વપૂર્ણ રાજકીય ઘટના છે. એવું માનવામાં આવે છે કે તે એક અઠવાડિયા સુધી ચાલશે જેમાં દેશભરમાંથી 2,300 પ્રતિનિધિઓ ભાગ લેશે. ચીનના પ્રધાન લી કેકિયાંગ નિવૃત્ત થવાના હોવાથી પાર્ટીની 20 મી રાષ્ટ્રીય કોંગ્રેસ મોટા નેતૃત્વ પરિવર્તન અંગે નિર્ણય લેશે. જિનપિંગને બેઇજિંગના ગ્રેટ હોલ ઓફ ધ પીપલ ખાતે યોજાનારી કોંગ્રેસમાં અનેક સરકારી હોદ્દાઓ પર ફેરબદલ કરવાની તક પણ મળશે.
લી કેકિયાંગ લેશે નિવૃત્તિ
કોંગ્રેસના એજન્ડામાં ચીનના બીજા નંબરના નેતા, પ્રીમિયર લી કેકિયાંગે માર્ચમાં કહ્યું હતું કે, "વડા પ્રધાન તરીકેનું આ મારું છેલ્લું વર્ષ છે." લી આ વર્ષે સરકારના અન્ય સભ્યોની સાથે નિવૃત્ત થવાના છે. સીપીસી કોંગ્રેસમાં તમામ સ્તરે નવા નેતૃત્વની રચના કરવામાં આવશે. સીપીસીના નિયમ મુજબ પાર્ટી અને સરકારનું નેતૃત્વ કરી રહેલા નેતાઓ પાંચ વર્ષની બે ટર્મ બાદ નિવૃત્ત થાય છે. કોંગ્રેસના આ એજન્ડામાં અનેક આંતરરાષ્ટ્રીય મુદ્દાઓ પણ હશે, જેમાં વોશિંગ્ટન દ્વારા ફેબ્રુઆરીમાં બેઇજિંગ ઓલિમ્પિકનો બહિષ્કાર, રશિયા-યુક્રેન યુદ્ધની નિંદા કરવા બેઇજિંગની હાકલ અને યુએસ કોંગ્રેસના સ્પીકર નેન્સી પેલોસીની તાઇવાનની મુલાકાતનો સમાવેશ થાય છે.
આજીવન રહેશે સત્તા પર
આજીવન સત્તામાં રહેવાની તૈયારી આ બધાની વચ્ચે બધાની નજર ચીનના રાષ્ટ્રપતિ શી જિનપિંગ પર રહેશે. લશ્કર અને પ્રમુખપદની ઓફિસનું નેતૃત્વ કરવા ઉપરાંત, સીપીસીના અધ્યક્ષ એવા જિનપિંગ તેમના પુરોગામીઓથી વિપરીત, હજુ પણ સત્તામાં રહેવાના છે. આ વર્ષે 10 વર્ષનો કાર્યકાળ પૂરો કર્યા બાદ તેઓ આજીવન સત્તામાં રહે તેવી શક્યતા છે. નિષ્ણાતો કહે છે કે જિનપિંગ ચીનને ફરીથી વ્યક્તિગત સરમુખત્યારશાહીમાં લઈ જઈ રહ્યા છે.