VTV વિશેષ / ચીનના જિનપીંગની વિચિત્ર માંગણી; હેલીકોપ્ટર નહિ ચાઇનીઝ કારમાં જ પ્રવાસ કરશે, જાણો આની પાછળનું કારણ

વડાપ્રધાન નરેન્દ્ર મોદી અને ચીનના રાષ્ટ્રપ્રમુખ શી જિનપીંગે હમણાં જ તામિલનાડુના મલ્લપુરમનો જોડે પ્રવાસ કર્યો. જો કે ચેન્નાઇ પહોંચ્યા પછી નરેન્દ્ર મોદી હેલીકૉપ્ટરમાં મલ્લપુરમ પહોંચ્યા હતા જયારે જિનપીંગે આશ્ચર્યજનક રીતે સડક માર્ગ પકડ્યો હતો. તેમણે તેમની ચેન્નાઇની હોટલથી મલ્લપુરમ સુધીનું અંતર સડકમાર્ગે તેમની વિશેષ "હોન્ગકી" લિમોઝોન કારમાં કાપ્યું હતું. સામાન્ય રીતે દેશના નેતાઓ હંમેશા હવાઈમાર્ગે પ્રવાસ કરતા હોય છે જયારે જિનપીંગે સડક માર્ગે યાત્રા કરતા આશ્ચર્ય ફેલાયું હતું.

શું છે "હોન્ગકી" કાર?

આ ઐતિહાસિક ગાડી ચીનના કોમ્યુનિસ્ટ પાર્ટીના સ્થાપક માઓ ઝેડોન્ગ દ્વારા વાપરવામાં આવતી હતી. આ કારના નામ "હોન્ગકી"નો અર્થ ચાઈનીઝ ભાષામાં લાલ ધ્વજ એવો થાય છે. ઉલ્લેખનીય છે કે જિનપીંગ ખુદ કોમ્યુનિસ્ટ પાર્ટીના રાષ્ટ્ર પ્રમુખ છે. 

"હોન્ગકી"નું નિર્માણ 1958માં ચાઇના ફર્સ્ટ ઓટો વર્કસ ગ્રુપ દ્વારા કરવામાં આવ્યું હતું. તે ચીનની કોમ્યુનિસ્ટ પાર્ટીની વિચારધારાઓના પ્રતિક તરીકે બનાવવામાં આવી હતી.  

ચીનના વિદેશ મંત્રાલયને જયારે આ અંગે પૂછવામાં આવ્યું ત્યારે તેમણે જવાબ આપતા જણાવ્યું હતું કે ચીનના નેતાઓ પ્લેન અથવા કારમાં પ્રવાસ કરે છે પરંતુ તેઓ હેલીકૉપ્ટર વાપરતા નથી. જિનપીંગે G 20 સમિટ જેવી મોટી મિટિંગોમાં પણ હેલીકૉપ્ટરનો ઉપયોગ નહોતો કર્યો. 

જિનપીંગ જે અત્યારે ચીનના માઓ પછીના સૌથી શક્તિશાળી નેતા બની ગયા છે તેઓએ પહેલી વખત ચીનના નેતાઓને ચીનની ગાડી વાપરવાની ભલામણ કરી હતી. 

જિનપીંગની "હોન્ગકી"ની જેમ અમેરિકાના રાષ્ટ્રપ્રમુખની વિશિષ્ટ કેડિલેક ગાડી છે જેનું હુલામણું નામ "ધ બીસ્ટ" છે. 

ચીનના બનેલા વાહનો વાપરવાનો આગ્રહ જિનપીંગે સૌ પ્રથમ વખત ૨૦૧૪ના ન્યુ ઝીલેન્ડના પ્રવાસ દરમિયાન કર્યો હતો. આ ઉપરાંત તેમણે આ વર્ષે એપ્રિલ મહિનાના ૩ એશિયન દેશોના પ્રવાસ વખતે પણ "હોન્ગકી"નો જ ઉપયોગ કર્યો હતો. 

કેમ જિન પીંગે "હોન્ગકી" કાર વાપરી? 

નિષ્ણાતોના મતે જિન પીંગના આ પગલાંની પાછળનો હેતુ અમેરિકા સામે ચાલી રહેલા ટ્રેડ વૉરમાં અમેરિકાને જવાબ આપવાનો હતો. 

ચીનની એક યુનિવર્સીટીના પ્રોફેસરે જણાવ્યું હતું કે આ પાછળનો ચીનની સરકારનો ઉદ્દેશ ચીનની ગાડીઓને આંતરરાષ્ટ્રીય મંચ સુધી લઇ જવાનો હતો. ચીન પોતે ખુબ ઉંચી ગુણવત્તાની ગાડીઓન ઉત્પાદન કરે છે. ચીનના નેતાઓને વિદેશી ગાડીઓ વાપરવાની કોઈ જરૂરિયાત નથી. 

"હોન્ગકી" કારનો ઉપયોગ છેલ્લે માઓએ 1970માં જયારે અમેરિકાના ત્યારના રાષ્ટ્રપ્રમુખ રિચાર્ડ નિક્સન ચીનની ઐતિહાસિક મુલાકાતે આવ્યા હતા ત્યારે કરવામાં આવ્યો હતો. ત્યાર બાદ ચીનના નેતાઓ બહારના દેશોની બનાવટની ગાડીઓ વાપરવા માંડ્યા હતા. જિન પીંગે ત્યાર બાદ 2012માં પહેલી વખત એક ભાષણમાં બોલ્યા હતા કે ચીનના નેતાઓએ ચીનની બનાવટની ગાડીઓ જ વાપરવી જોઈએ.