વિશ્વભરમાં કોરોના વાયરસના સંક્રમણમાં સતત વધારો થઇ રહ્યો છે. આ મહામારીએ વિશ્વનાં 50 લાખથી વધુલોકોને પોતાની ઝપેટમાં લીધા છે ત્યારે દુનિયાનાં ઘણા દેશ ચીનથી આ મુદ્દે સવાલ કરી રહ્યા છે. વુહાનની જે માર્કેટમાંથી કોરોના વાયરસ ફેલાવ્યો હતો તે જ માર્કેટ ચીનમાં ફરીથી ધમધમતું થતાં ઘણા દેશો ઉકળી ઉઠ્યા હતા. જે બાદ હવે ચીન પણ ઝૂકી ગયું હોય તેવું દેખાઈ રહ્યું છે. ચીને વુહાન શહેરમાં જંગલી જાનવરો ખાવા પર પ્રતિબંધ લગાવ્યો છે.
વુહાનની સરકારે જંગલી પ્રાણીઓ ખાવા પર પ્રતિબંધ લગાવ્યો
વુહાનની માર્કેટમાંથી જ કોરોના ફેલાયો હોવાની દુનિયાને આશંકા
વિશ્વના અનેક દેશોના સવાલો સામે ચીન દબાણમાં
વુહાનની સરકારે બહાર પાડ્યું જાહેરનામું
ચીનની ગ્લોબલ ટાઈમ્સના અહેવાલ મુજબ વુહાન સરકારની વેબ્સાઈટ પર એક નવું રેગ્યુલેશન બહાર પાડવામાં આવ્યું છે જેમાં જંગલી જાનવરો ખાવા અને તેમના શિકાર કરવા પર પ્રતિબંધ લગાવવામાં આવે છે. આદેશાનુસાર આ સૂચીમાં મહત્વપૂર્ણ સંરક્ષણ હેઠળના જલીય જંગલી જાનવર અને લુપ્તપ્રાય જલીય જંગલી જાનવરોનો પણ સમાવેશ થાય છે.
આ આદેશ બાદ વુહાનમાં શિયાળ, મગર, વરુ, સાંપ, ઉંદર અને મોર સહીત જંગલી જાનવરો ખાવા પર આગામી 5 વર્ષ સુધી પ્રતિબંધ લગાવામાં આવ્યો છે. આટલું જ નહીં કોઈ પણ વ્યક્તિ વાઈલ્ડલાઈફથી જોડાયેલા ઉત્પાદકોના પ્રોડક્શન અને ઉપયોગ પર પ્રતિબંધ લગાવામાં આવ્યો છે. ચીન જેવા દેશમાં જ્યાં જાનવરોને ખાવાના શોખીનોની સંખ્યા ખૂબ વધારે છે ત્યારે વુહાનમાં આ નિર્ણયને ખૂબ મોટા પગલાં તરીકે જોવામાં આવી રહ્યું છે.
દુનિયાના ઘણા જાનવરોનું માંસ વુહાનની માર્કેટમાં વેચાય છે
વુહાનનું આ માર્કેટ વિશ્વનું સૌથી અનોખું માર્કેટ છે, અહિયાં દુનિયાનાં અલગ-અલગ પ્રાણીઓનું માંસ વેચાય છે. અજગર, કાચબા, કાચિંડા, ચામાચિડિયા, ચિત્તા, જંગલી બિલાડી, વિવિધ પ્રકારના જીવડા, કરચલા, વગેરે ખૂબ વેચાય છે. શોધમાં દાવા કરવામાં આવ્યા છે કે આ જ માર્કેટમાંથી કોરોના વાયરસ વિશ્વભરમાં ફેલાયો છે. જાન્યુઆરી મહીનામાં ચીને આ માર્કેટ પર અસ્થાયી પ્રતિબંધ ફરમાવ્યો હતો. જે બાદ હવે 5 વર્ષ સુધી પ્રતિબંધ લગાવી દેવામાં આવ્યો છે, ચીનનાં આ નિર્ણયનાં કારણે સ્પષ્ટ છે કે ચીન પર દુનિયાનાં દેશોનું દબાણ વધી રહ્યું છે.