આગામી થોડા દિવસોમાં શિવભક્તોમાં અતિપ્રિય એવા શ્રાવણ માસનો પ્રારંભ થવા જઈ રહ્યો છે. ત્યારે સુરતના 4 શિવજીના ભક્તોએ ભગવાન ભોલેનાથ માટે પોતાનો પ્રેમ એક વિડીયો થકી પ્રદર્શિત કર્યો છે.
દેવાધિદેવ મહાદેવના અલગ અલગ રૂપ અને અલૌકિક શક્તિનું વર્ણન શિવતાંડવ સ્ત્રોતમમાં કરવામાં આવ્યું છે. શિવભક્ત રાવણ દ્વારા રચવામાં આવેલા શિવતાંડવ સ્ત્રોતમનો મહિમા અનેરો છે. ત્યારે સુરતના ચાર યુવાનો કે જેઓ શિવભક્ત પણ છે તેઓએ પોતાની કલા દ્વારા તેનું વિડીયો વર્ઝન તૈયાર કરવામાં આવ્યું છે.
સુરતના આ યુવાનોએ વિશ્વના સૌથી ઊંચા શિવમંદિર પર આ વીડિયો શૂટ કર્યો છે. ઉત્તરાખંડના રુદ્રપ્રયાગ જિલ્લામાં બરફના પહાડોની વચ્ચે તુંગનાથ મહાદેવનું શિવમંદિર આવેલું છે. 12073 ફૂટની ઊંચાઈએ આવેલું આ 5000 વર્ષ જૂનું પ્રાચીન શિવાલય પાંચ કેદારમાં તૃતિય કેદાર તરીકે પણ ઓળખાય છે. ધાર્મિક રીતે આ શિવલયનું મહત્વતો છે જ પણ વિશ્વમાં પણ તે સૌથી ઊંચું શિવમંદિર માનવામાં આવે છે.
રાગ આહીર ભૈરવ પર કંપોઝ થયેલા 7 મિનિટના વીડિયોમાં તુંગનાથ મંદિરનો મહિમા, મંદિર પરિસર તથા આજુબાજુના વિસ્તારના નયનરમ્ય દશ્યો આવરી લેવામાં આવ્યા છે.
સુરતના 4 યુવાનો જેમાં જય વર્મા, સ્વપ્નિલ નેગીએ, દિવ્યેશ યાદવ, ધ્રુવીક ગલાણીએ સતત 10 દિવસ સુધી માઇનસ 15 ડીગ્રી તાપમાન અને ચારેબાજુ બરફની ચાદર વચ્ચે કામ કર્યું છે. તાપમાનના કારણે તેઓને ડ્રોન શૂટ કરવામાં પણ ઘણી તકલીફ પડી હતી.
શ્રાવણ મહિનામાં શિવભક્તો પોતાની રીતે શિવજીને પૂજતા હોય છે અને ભોલેનાથ માટે પોતાની ભક્તિ દર્શાવતા હોય છે. તેવામાં સુરતના આ ચાર યુવાનોએ ભગવાન ભોલેનાથ માટે પોતાનો ભાવ દર્શાવ્યો છે.