ક્રેડિટ સુઈસને કટોકટીમાંથી બહાર કાઢવા માટે, સ્વિટ્ઝર્લેન્ડની સૌથી મોટી યુનિયન બેન્કે તેના અધિગ્રહણની જાહેરાત કરી છે. UBS આ ડીલ માટે 3.23 બિલિયન ડોલર ખર્ચ કરશે.
નાદારી તરફ આગળ વધેલી સ્વિસ બેંક ક્રેડિટ સુઈસ માટે સારા સમાચાર
સ્વિટ્ઝર્લેન્ડની યુનિયન બેંકે કર્યો સોદો
UBS આ ડીલ માટે 3.23 બિલિયન ડોલર ખર્ચ કરશે
આ સમયે સમગ્ર વિશ્વમાં બેંકિંગ જગતમાં ભારે હલચલ જોવા મળી રહી છે. પહેલા અમેરિકાની બે મોટી બેંકો ડૂબી ગઈ પછી બીજા જ દિવસે વિશ્વની બેંકિંગ સિસ્ટમની કરોડરજ્જુ કહેવાતી બેંક ક્રેડિટ સુઈસ પર પણ સંકટ મંડરાતો જોવા મળી રહ્યો હતો. એવામાં હાલ સમાચાર આવી રહ્યા છે કે સ્વિટ્ઝર્લેન્ડની યુનિયન બેંક (UBS) નાદારી તરફ આગળ વધેલી સ્વિસ બેંક ક્રેડિટ સુઈસને ખરીદવા માટે સંમત થઈ છે.
બેંકિંગ કટોકટી વચ્ચે એક સારા સમાચાર
અમેરિકા બાદ યુરોપમાં શરૂ થયેલી બેંકિંગ કટોકટી વચ્ચે એક સારા સમાચાર સામે આવ્યા છે. પહેલા દિવસે ક્રેડિટ સુઈસને સ્વિસ સેન્ટ્રલ બેંક તરફથી મદદ મળી હતી પણ હવે હરીફ બેંક UBS તેના માટે ભંડોળ એકત્ર કરનાર તરીકે આવી છે.
આર્થિક મંદીના અવાજ વચ્ચે રાહત સોદો
ક્રેડિટ સુઈસને કટોકટીમાંથી બહાર કાઢવા માટે, સ્વિટ્ઝર્લેન્ડની સૌથી મોટી બેન્ક યુનિયન બેન્ક ઓફ સ્વિટ્ઝર્લેન્ડે તેના અધિગ્રહણની જાહેરાત કરી છે. એજન્સીના જણાવ્યા અનુસાર UBS આ ડીલ માટે 3 બિલિયન સ્વિસ ફ્રેંક એટલે કે 3.23 બિલિયન ડોલર ખર્ચ કરશે. આ સાથે સ્વિટ્ઝર્લેન્ડની યુનિયન બેંક પણ ક્રેડિટ સુઈસ બેંકના $5.4 બિલિયનનું નુકસાન સ્વીકારવા માટે તૈયાર થઈ ગઈ છે. વૈશ્વિક ઉથલપાથલ અને વિશ્વમાં આર્થિક મંદીના અવાજ વચ્ચે તેને રાહત સોદો ગણાવવામાં આવી રહ્યો છે.
સ્વિટ્ઝર્લેન્ડની સેન્ટ્રલ બેન્કે જણાવ્યું હતું કે સ્વિસ ફેડરલ સરકાર સ્વિસ ફાઇનાન્સિયલ માર્કેટ સુપરવાઇઝરી ઓથોરિટી અને સ્વિસ નેશનલ બેન્કના સમર્થનથી આ અધિગ્રહણ શક્ય બન્યું હતું. ડીલ હેઠળ ક્રેડિટ સુઈસના શેરધારકોને રાખવામાં આવેલા દરેક 22.48 શેર માટે એક UBS શેર મળશે.
શેરમાં 25 ટકા સુધીનો ઘટાડો થયો હતો
જાણવી દઈએ કે ક્રેડિટ સુઈસ બેંકની ગણતરી યુરોપની ટોચની બેંકોમાં થાય છે. તે સ્વિટ્ઝર્લેન્ડની બીજી સૌથી મોટી બેંક છે. આવી સ્થિતિમાં અમેરિકા બાદ જ્યારે યુરોપની આ બેંકની બગડતી હાલતની માહિતી સામે આવી છે, ત્યારે દુનિયાની સામે આર્થિક સંકટ વધુ ઘેરા થવાનો ખતરો શરૂ થઈ ગયો છે. આ સાથે જ બેંકને સ્થિતિના સમાચાર સામે આવ્યા બાદ એક દિવસમાં તેના શેરમાં 25 ટકા સુધીનો ઘટાડો થયો હતો.
સ્વિટ્ઝર્લેન્ડ સાથેની ડીલ બાદ આ સંકટ ટળતું જણાય
નોંધનીય છે કે આ પહેલા પણ સ્વિસ નેશનલ બેંક ક્રેડિટ સુઈસની ડિપોઝિટ કટોકટીમાંનથી બહાર કાઢવામાં સામેલ હતી. સ્વિસ નેશનલ બેંકે કહ્યું હતું કે તે ક્રેડિટ સુઈસને $54 બિલિયનની લોન આપશે. 2008ની નાણાકીય કટોકટી પછી ક્રેડિટ સુઈસ એ પ્રથમ મોટી વૈશ્વિક બેંક છે જેને ઈમરજન્સી લાઈફલાઈન આપવામાં આવી છે. આ સાથે જ તમને જણાવી દઈએ કે ક્રેડિટ સુઈસ બેન્કના બોન્ડની કિંમત માર્ચમાં અત્યાર સુધીમાં 38 ટકા ઘટી છે. આ ઘટાડો સૂચવી રહ્યો છે કે જો બેંક નાદાર થઈ જશે તો આ બોન્ડની કિંમત લગભગ નહિવત્ થઈ જશે. સાથે જ એવી આશંકા હતી કે બેંકિંગ કટોકટી 2008 જેવી આર્થિક મંદીનું કારણ બનશે પણ હવે યુનિયન બેંક ઓફ સ્વિટ્ઝર્લેન્ડ સાથેની ડીલ બાદ આ સંકટ ટળતું જણાય છે.