ભાવનગરઃ ગ્રાફોલોજીના ક્ષેત્રે છેલ્લા ૨૫ વર્ષથી કાર્યરત એવી ભાવનગરની પ્રખર મહિલા જ્યોતિષ કૌશલ્યા દેસાઈને મહર્ષિ વેદવ્યાસ એકેડમી દ્વારા PHDની ડીગ્રી પ્રાપ્ત થઇ છે. જેને લઇને કૌશલ્યા દેસાઈ ગુગલ સાઈટ ઉપર વિશ્વની પ્રથમ ગ્રાફોલોજિસ્ટ મહિલા તરીકેનું સ્થાન મેળવીને સમગ્ર દેશમાં ભાવનગરનું નામ રોશન કર્યું છે.
ગ્રાફોલોજી એટલે શું?
ગ્રાફોલોજી એટલે હસ્તાક્ષર વિધા અને આ વિદ્યા આપણા દેશમાં પ્રાચીન વિદ્યામાની એક વિદ્યા ગણાય છે. આ વિદ્યાનો ઉદ્ભવ આમ તો ફ્રાંસમાં થયો છે અને ત્યાં ઉચ્ચ કોટીના ધર્મગુરુઓ પણ આ ક્ષેત્રમાં જોવા મળ્યા છે. ફ્રાંસના માઈકલે હસ્ત વિદ્યાના આધુનિક ગુરુ છે. તેમણે આ વિદ્યાને ગ્રાફોલોજી નામ આપ્યું છે.
ભાવનગરનું નામ વિશ્વમાં ગુંજતું કર્યું
ભાવનગરમાં છેલ્લા ૨૫ વર્ષથી જ્યોતિષ ક્ષેત્રે અને ગ્રાફોલોજીના ક્ષેત્રે કૌશલ્યા દેસાઈ સારો એવો અનુભવ ધરાવે છે. આ મહિલાએ મહર્ષિ વેદવ્યાસ એકેડમીમાં ગ્રાફોલોજી વિષય અંતર્ગત PHDની પદવી મેળવીને ભાવનગરનું નામ વિશ્વમાં ગુંજતું કર્યું છે. તેમની હસ્તાક્ષર વિશ્લેષણની કળાને લઇને તેમને રાજ્ય અને કેન્દ્ર સરકારના અનેક એવોર્ડ પણ પ્રાપ્ત થયા છે. તાજેતરમાં તેમને ગુગલની સાઈટ ઉપર એક લાખથી વધુ ફોલોવર થતા વિશ્વની પ્રથમ મહિલા તરીકે તેઓ જાહેર થયા છે.
લંડનની ગ્રાફોલોજી યુનિવર્સીટીમાં પણ લેકચર આપવા માટેનું આમંત્રણ
ગ્રાફોલોજીના ક્ષેત્રે હસ્તાક્ષર ઉપરથી જ લોકોનું ભવિષ્ય જાણવાનું કામ કૌશલ્યા દેસાઈ છેલ્લા ૨૫ વર્ષથી કરે છે. તેમણે આ ક્ષેત્રમાં અનેક પુસ્તકો પણ લખ્યા છે. કૌશલ્યા દેસાઈને લંડનની ગ્રાફોલોજી યુનિવર્સીટીમાં પણ લેકચર આપવા માટેનું આમંત્રણ મળ્યું છે. નાનપણથી જ આ ક્ષેત્રમાં રસ ધરાવતા કૌશલ્યા દેસાઈ એક સામાન્ય પરિવારમાંથી આવે છે અને હાલ તેઓ વિશ્વસ્તરે નામના મેળવી ચુક્યા છે.
ઈંટરનેટ જેવા અને સોશિયલ મીડિયાનાં સહારે આંગળીના ટેરવે લોકો આજે ઘેર બેઠા દેશ વિદેશની જાણકારી મેળવતા હોય છે. તેવા સમયે કૌશલ્યા દેસાઈએ તાજેતરમાં જ ગુગલ સાઈટ પર મેળવેલ સ્થાનથી દુનિયામાં ભાવનગરનો ડંકો વાગ્યો છે.