iPhone XS ખરીદવા માટે 1.07 લાખના સિક્કા બાથટબમાં લઇને પહોંચ્યો યુવક

Appleના iPhoneને લઇને લોકોમાં કેટલી હદ સુધીની દિવાનગી છે તેનું ઉદાહરણ તાજેતરમાં જોવા મળ્યુ. જી હા રશિયામાં એક યુવકે iPhone લેવા બાથટબ ભરી સિક્કા લાવ્યો હતો. મંગળવારે કેટલાંક યુવાનો રુસી રૂબલથી લદોલદ એક બાથ ટબ લઈને સેન્ટ્રલ મોસ્કોના યેવરોપીસ્કી મોલમાં આવ્યાં હતા. આ અંગેનો એક વીડિયો સોશિયલ મીડિયામાં વાયરલ થયો હતો. બાથટબમાં 1 લાખ રુસી રૂબલ એટલે કે લગભ 1.07 લાખ રૂપિયાના સિક્કા હતા. આ સિક્કા એપલ સ્ટોરમાં આપી યુવકે iPhone XSનો 256 GB સ્ટોરેજ વાળો ફોન ખરીદ્યો હતો.

એક અંગ્રેજી રિપોર્ટ અનુસાર આ યુવક પોતાની સાથે માત્ર બાથટબમાં 1.07 લાખ રૂપિયાના સિક્કા જ નહોતો લાવ્યો પરંતુ તેને ઉઠાવવા માટે પોતાના મિત્રોને પણ સાથે લઇને પહોંચ્યો હતો. એપલ સ્ટોરના માલિક લુડમિલા સેમુશિનાએ જણાવ્યું કે બાથટબમાં સિક્કા ભરીને પહોંચેલા યુવકને જોઇને પહેલા તો આશ્ચર્ય થયું પરંતુ તેને પાછો મોકલવામાં આવ્યો નહોતો. તેમણે વધુમાં જણાવ્યું કે આટલા બધા સિક્કાઓને ગણવા માટે એક સ્પેશિયલ ક્લાર્કને બેસાડવામાં આવ્યો હતો ત્યારબાદ તેને 256 GB સ્ટોરેજવાળો iPhone XS આપવામાં આવ્યો હતો.

તમને જણાવી દઇએ કે આ બાથટબનું વજન 350 કિલોગ્રામ એટલે કે 770 પાઉન્ડ જેટલું હતું. વાયરલ થયેલાં વીડિયો મુજબ સિક્કા ભરીને બાથટબ જ્યારે મોલમાં પ્રવેશ્યું ત્યારે તેને મોલના સિક્યોરિટી ગાર્ડે સુરક્ષા આપી હતી. આ અંગે iPhone લેનાર યુવક કોવાલેન્કોએ રશિયન મીડિયાને જણાવ્યું કે કોઈ પણ જગ્યાએ છૂટાં પૈસા આપવાની ભારે માથાકૂટ જોવા મળે છે. જ્યારે છૂટાં પૈસા માગવામાં આવે તો તેનો એટિટ્યૂડ ઘણો ખરાબ હોય છે. જેતી તમને પાઠ ભણાવવા માટે માત્ર સિક્કા લઇને જ iPhone લેવા માટે ગયો હતો.